Lélegu laxveiðisumri að ljúka

Laxveiðiárnar eru nu flestar að loka eða þegar búnar að loka. Fer það aðeins eftir landsvæðum en Borgarfjarðarárnar eru flestar búnar að birta lokatölu. Þverá/Kjarrá nálgast tölu síðasta árs með góðum lokaspretti. Hins vegar eru Norðurá verulega undir tölum síðasta árs en einna verst er útkoman í Langá. Hún stendur nú í 663 löxum en skilaði í fyrra 1.077. Síðustu dagarnir fara nú í hönd í Langá og vissulega getur hún híft þessa tölu upp en gapið er stórt.

Á jákvæðari nótum má sjá að Laxá í Aðaldal er að eiga betra sumar en síðustu ár. Nálgast hún sjö hundruð laxa og er það mikil bæting. Sorgleg staðreynd að menn fagni tæplega sjö hundruð löxum í þeirri mögnuðu á. Hins vegar kann þessi bæting að vita á gott.

Vopnafjörðurinn átti ágætt sumar þó svo að engin men væru slegin en þar mega menn una sáttir við sitt.

Seiðasleppingaárnar, þær systur Rangár eru enn opnar og verður langt fram í október. Þar kom loks kippur í þá Eystri og skilaði hún bestu vikuveiðinni sem angling.is mældi í síðustu viku. Þetta laxveiðisumar er sumsé að nálgast endamarkið og við taka norskir kafarar og starfsmenn veiðifélaga við að háfa upp eldislaxa sem nú eru komnir í flestar ár á Vestan- og norðanverðu landinu. Þeir fiskar rata ekki í veiðibækur heldur munu enda hjá Hafrannsóknastofnun og jafnvel fyrir dómstólum. En tíminn leiðir það í ljós.

Þessar eru afla­hæstar samkvæmt tölum frá angling.is, sem er síða Landssambands veiðifélaga. Listann má sjá hér að neðan. Í fyrsta dálki er fjöldi laxa veidd­ur og miðast sú tala við 20. september, eða eru lokatölur þar sem ár hafa lokað. Í dálki tvö er svo viku­veiðin. Þriðji dálk­ur­inn, inn­an sviga, er fjöldi laxa á sama tíma í fyrra, eða 21. september. Töl­ur í þessum lista yfir tíu afla­hæstu árn­ar eru fengn­ar af vef Lands­sam­bands veiðifé­laga, angling.is og einnig af angling iq app­inu þar sem ra­f­ræn skrán­ing á veiðinni fer fram. Upp­lýs­ing­ar um stöðuna í fleiri ám má nálg­ast á báðum þessum síðum. 

Ytri-Rangá og      3.130        163       (4.442)

vest­urb. Hóls­ár 

Eystri-Rangá       2.204         238       (3.412)

Þverá/​Kjar­rá       1.303          --        (1.414) Lokatala

Miðfjarðará          1.199         74       (1.522)

Selá í Vopnafirði  1.234          --       (1.164) Lokatala

Hofsá                 1.088          --        (1.211) Lokatala

Norðurá              1.087          --        (1.349) Lokatala

Haffjarðará          905            --        (870) Lokatala

Laxá í Aðaldal       685           53         (402)

Langá                  663           --          (1.077)

Angling.is birtir vikulega tölur úr öllum laxveiðiánum.

• Blogga um frétt

Seinustu hundraðkallar sumarsins