Sex stúlkur keppa í „stangveiðidraumi“

Hinn hugmyndaríki og orkumikli reykvíkingur ársins árið 2023 bryddar nú upp á enn einni nýjung með nemendum í tíunda bekk í Rimaskóla. Mikael Marinó Rivera er kennari í skólanum og innleiddi nám í stangveiði. Lokaverkefnið í ár hjá hluta hópsins er veiðidraumur í ætt við vinsælu sjónvarpsþættina Draumurinn sem Auddi, Sveppi, Steindi og Jóhann Pétur hafa gert fyrir Stöð 2.

Samtals eru fjórtan nemendur í Rimaskóla í stangveiðiáfanganum. Átta strákar og sex stelpur Allir nemendur eru nú að vinna að lokaverkefnum og hugmyndin að Draumnum kom frá stelpunum sjálfum. Þær hafa myndað tvö lið og þau fengið nöfn. Það er annars vegar Munro killer liðið og svo er það Nighthawk. Nöfnin eru af dýrari gerðinni en bæði þessi nöfn eru dregin af klassískum flugum. Báðar öflugar og gefa árlega mikið af laxi. 

Þurfa að ná alslemmu

Markmiðið í keppninni er að veiða það sem þær kalla alslemmu. Til að ná slemmunni þarf liðið að veiða lax, bleikju, sjóbirting og urriða staðbundinn. Hver tegund gefur stig, eins og lög gera ráð fyrir í þessum leik. Margvíslegar leiðir eru í boði til að ná sér í aukastig. Til dæmis með því að veiða „aukaleikara“ sem eru hornsíli, flundra, áll og hnúðlax. Eins og vera ber þegar keppt er í draumi, þá verða í boði áskoranir sem stengjast stangveiði og gefa þær stig.

Lið Nighthawk. Hrafndís Bára, Ebba Katrín og Kristjana Rut. Markmiðið er að ná alslemmu sem er lax, sjóbirtingur, bleikja og urriði. Svo eru alls konar aukastig í boði. Ljósmynd/Mikael Marinó

Keppnin fer fram á fimm veiðisvæðum og allt eru það spennandi svæði. Þingvallavatn, Skuggi, Leirvogsá, Korpa og síðast en ekki síst Grímsá. Allt svæði sem geta boðið upp á mögnuð ævintýri.

Keppnin verður fest á filmu, bæði til fróðleiks og ekki síður til gamans. Sporðaköst munu fylgjast með draumnum nú í vor og vonandi getum við birt efni þegar keppninni vindur fram og lokaverkefninu lýkur, í lok mánaðarins.

En lítum á liðin. Nighthawk skipa þær Kristjana Rut, Hrafndís Bára og Ebba Katrín.

Munro killer liðið eru þær Alexöndra Sól, Halla Björg og Emma Sigrún.

Lið Munro Killer. Alexandra Sól, Emma Sigrún og Halla Björg. Þær eru til í slaginn og stutt er í fyrstu veiðiferðina. Ljósmyndari/Mikael Marinó

Í morgun var formleg myndataka af liðunum. Allar í fullum skrúða tilbúnar í drauminn. Við heyrðum í liðunum í skólastofunni, þar sem undirbúningur var á fullu. Fyrsta spurning var hvort þær hefðu allar veitt fisk. Þetta þótti hálf léleg spurning og þær hafa veitt fisk. Sumar lax, aðrar silung og meira segja ein sem landaði risa sjóbirtingi í Litháen. Þær vor á hátalara í síma en voru virkilega til í þetta. Eins og ein sagði. „Við ætlum að gefa allt í þetta.“

Auðvitað er búið að búa til logo með styrktaraðilum. Stelpurnar eru að taka þetta alla leið. Ljósmynd/Mikael Marinó

Aðspurðar af hverju veiðiáfangi hefði höfðað til þeirra var þær sammála um að langa að kynnst veiði meira og ein hafði á orði að hún hefði ekki vitað hvar hún hefði átt að byrja. Því var áfanginn kærkominn. Svo voru þær sammála um að það væri frábært að fara í ferðir og Mikael reddar öllu. Eina vesenið eru vöðlur en þær sögðust myndu redda því.

Hér er svo allur hópurinn ásamt Mikael Marinó Rivera umsjónarkennara í valáfanganum. Mikael er með mikla veiðidellu og hefur gert ýmislegt á því sviði. Er til að mynda höfundur veiðispilsins Makkerinn, svo eitthvað sé nefnt. Ljósmynd/Mikael Marinó

Fyrir áhugasama er hægt að fylgjast með framvindu málsins á samfélagsmiðlum. Til dæmis á Tiktok og leita að tiktok.com/@stangveididraumurinn svo er það heimasíðan https://leakim.my.canva.site/stangveidi-draumurinn.

• Blogga um frétt

Seinustu hundraðkallar sumarsins