Miðfjarðará gaf þrjá en Kjósin bíður

Þrír fyrstu laxarnir í Miðfjarðará komu á land eftir hádegi. Einn í Kambsfossi og tveir veiddust í Spenastreng í Austurá. „Þeir koma,“ sagði Rafn Valur Alfreðsson leigutaki í samtali við Sporðaköst, eftir morgunvaktina og var alveg rólegur. Og þeir komu.

Rafn veiddi sjálfur annan af löxunum sem veiddust í Spenastreng. Hinn laxinn fékk Hilmir Víglundsson og Valgarður Ragnarsson landaði laxi í Kambsfossi. Laxinn var á hreyfingu og sást fjölga fiskum til dæmis undir Kambsfossi. 

Hilmir Víglundsson með nýrenning úr Spenastreng. Alls komu þrír laxar úr Miðfjarðará á opnunardegi. Ljósmynd/Rafn Alfreðsson

Sama var uppi á teningnum í Kjarrá. Tveimur löxum var landað þar seinnipartinn, þannig að opnunardagurinn gaf samtals sjö laxa. Sett var í laxa á öllum svæðum nema því efsta. Veiðimenn sem voru á neðsta svæði árinnar urði varir við mikið líf. Aðstæður voru með þeim hætti að það var glampandi sól og hæg norðanátt. Þegar klukkan var að nálgast sjö í kvöld mældist hitastig Kjarrár sextán gráður. Það kólnaði hratt þegar leið á kvöld og þá var veiðinni sjálfhætt. En góður dagur, að mati Ingólfs Ásgeirssonar.

Í Laxá í Kjós var óbreytt staða fram eftir kvöldi. Stífur vindur úr vestri og ekki náðist fyrsti laxinn. „Það kemur á morgun,“ sagði Haraldur Eiríksson, leigutaki í lok dags.

• Blogga um frétt

Seinustu hundraðkallar sumarsins