Flugurnar verða að vera sexí og fallegar

Hann Dagur Árni Guðmundsson er sérvitringur þegar kemur að veiði. Orðið sérvitringur er ekki sett fram hér í neikvæðri merkingu. Hann veiðir mest í Kaliforníu og vissulega líka á Íslandi. Hann tekur í dag Kaliforníu fram yfir Ísland þegar kemur að stangveiði. Dagur Árni er í hressilegu viðtali í nýju Sportveiðiblaði sem komið er út. Hann er ekkert að skafa af hlutunum og tekur til að mynda vorsjóbirtingsveiðina til bæna.

Viðtalið er hið skemmtilegasta enda Dagur Árni með einstaka sýn og langt í frá að vera einhvers konar klisjuveiðimaður. Hafsteinn Már Sigurðsson tekur viðtalið. Fáum eitt lítið dæmi: „Ég hef verið að hnýta svo lengi, meira að segja áður en ég byrjaði að veiða sex ára gamall, segir Dagur og hlær. Fyrir mér fylgir frelsi hnýtingunum og auðvitað miklar pælingar. Mér finnst flugurnar verða að vera sexí, fallegar og hafa einhverja tengingu við náttúruna. Ég nenni ekki að hnýta mýpúpu úr rauðu vínil ribbi þó að það virki alveg.“

Sportveiðiblaðið sem nú er komið út er fyrsta tölublað 43. árgangs. Þau eru ekki mörg tímaritin sem hafa lifað svo lengi í samfelldri útgáfu og harðandi samkeppni við samfélagsmiðla og í margháttaða afþreyingu sem í boði er.

Blaðið núna er fjölbreytt að vanda og er fjallað bæði um stang– og skotveiði. Gunnar Bender, ritstjóri og Marteinn Jónasson, útgáfustjóri ásamt Vigdísi Jóhannsdóttur framkvæmdastjóra voru sátt með útkomuna þegar þau flettu fyrstu eintökunum. Útlit blaðsins hefur tekið miklum breytinum.

• Blogga um frétt

Seinustu hundraðkallar sumarsins