Besta í 10 ár en margir áttu von á meiru

Opnun í Kjarrá lauk á hádegi í dag og stóð í þrjá og hálfan dag. Samtals veiddust 28 laxar og er það besta opnun síðan 2016, eins í Þverá. Bjartsýnustu menn áttu von á enn stærri opnun en 28 laxar er eitthvað sem allir eru í skýjunum með, að sögn Ingólfs Ásgeirssonar leigutaka.

Veiðin var jöfn flesta daga nema hvað aðeins einn fiskur veiddist í morgun, á síðustu vakt. Síðasta laxinn í opnuninni fékk Gími yfirleiðsögumaður, eða Hallgrímur Gunnarsson. Gími er lifandi goðsögn á fjallinu og hefur verið leiðsögumaður og yfirleiðsögumaður í 43 ár í Kjarrá. Hann og Ingólfur Ásgeirsson deildu stöng í opnuninni. Í morgun var för heitið í Runka þar sem sáust laxar í gær. Þar var engin stemming þannig að Gími taldi rétt að kíkja i Hornhyl. Hann kíkti í fluguboxið hjá Ingólfi og valdi flugu sem gaf vel um 1990 í Kjarrá. Fór hún vel við gömlu Sage stöngina og Hardy Marquis klassíska fluguhjólið.

Það elta ekki allir tískubylgjur. Þetta eru græjurnar hjá Gíma. Ljósmynd/Ingólfur Ásgeirsson

 „Það sem virkaði vel hérna áður fyrr gerir það enn í dag,“ sagði Ingólfur Ásgeirsson í samtali við Sporðaköst. Það var ekki að spyrja að því að Gími setti í hann og landaði 28. laxinum. Fór vel á því að yfirleiðsögumaðurinn setti punktinn aftan við i–ið.

Yfirleiðsögumaðurinn einbeittur fyrir allan peninginn. Þessi kom á land að lokum. Ljósmynd/Ingólfur Ásgeirsson

Ingólfur segist bjartsýnn á framhaldið og ævintýri á fjallinu. Það kemur í ljós á næstu vikum hvernig smálaxinum reiðir af. Nú styttist í hann í Borgarfirðinum og það er hann sem heldur uppi tölunum. 

• Blogga um frétt

Seinustu hundraðkallar sumarsins