Ratcliffe og fjölskylda opnar NA-hornið

Ratcliffe fjölskyldan hefur síðustu daga opnað laxveiðiár Six Rivers Iceland á Norðausturhorninu. Six Rivers er félag Jim Ratcliffe sem á hlut í og leigir, Selá, Hofsá, Hafralónsá Miðfjarðará og Vesturdalsá. 

Fyrst var Selá opnuð og í gær landaði Jim Ratcliffe tveimur löxum, öðrum í Bjarnarhyl og hinum úr Fossi. Síðustu daga hafa gengið sjö til átta laxar á dag í gegnum teljarann í Selá og segir Gísli Ásgeirsson, framkvæmdastjóri Six rivers að það sé fáheyrt að svo margir laxar hafi gengið í gegnum teljarann á þessum tíma, svo snemma sumars.

George Ratcliffe landaði þeim fyrsta úr Hafralónsá. Hér er hann í með 74 sentímetra hrygnu sem hann landaði í veiðistaðnum Stapa. Ljósmynd/Six Rivers

Hafralónsá var opnuð í morgun og þar var fjórum löxum landað. Tveimur í Gústa og öðrum tveimur í Stapa. Einn af þessum fjórum var smálax, hængur og telst það til tíðinda að smálax veiðist svo snemma í Hafralónsá.

Næsta verkefni var Miðfjarðará og náðist þar lax í Réttarhyl. Hofsá var veidd í gær á neðri svæðum en þar fékkst ekki lax og stóð til að fara aftur þangað á seinni vaktinni. Raunar gerðist það einmitt í þessum skrifuðu orðum. Sam Ratcliffe landaði hnausþykkum tveggja ára laxi úr Netahyl.

Feðgar í fíling. Fyrsti laxinn sem veiðist ofan Foss í Selá. 73 sentímetra hrygna úr Bjarnarhyl. George Ratcliffe landaði þessum. Gamli maðurinn er kátur. Ljósmynd/Six Rivers

„Það er kominn fiskur í allar árnar og árferðið er gott. Allt orðið iðagrænt og komin slikja á botninn enda veður verið einstaklega gott. Við erum í sjálfu sér ekkert að lesa í þá stöðu sem við sjáum í ánum og teljurum. Þetta er punktstaða og lítið hægt að álykta um sumarið í heild sinni út frá því. Vissulega eru þetta góðar vísbendingar en ekkert meira,“ sagði Gísli Ásgeirsson í samtali við Sporðaköst.

Óhætt er að segja að veiðiálagið í þessum opnunum er ekki mikið. Jim Ratcliffe dvelur á svæðinu og opnar árnar með fjölskyldu og vinum. Eftir að hann hefur lokið sér af tekur við hefðbundnari veiði. Kvótasetningar í ánum, eins og í Hofsá og Selá gera það að verkum að erfitt er að bera saman veiðina nú í sumar, við fyrri ár. Einungis er heimilt að veiða fjóra laxa í Selá og eftir það er veiði hætt á þeirri vaktinni. Öllum fiski er sleppt.

Fyrsti laxinn úr Hofsá í sumar veiddist í Netahyl. Sam Ratcliffe fékk hann áðan. Ljósmynd/Six Rivers

Félagið Six Rivers er óhagnaðardrifið félag sem hefur það að markmiði að vernda Atlantshafslaxinn. Stórlega hefur verið dregið úr veiðiálagi í ám félagsins og mikið rannsóknarstarf fer þar fram.

Eigandi Six Rivers Iceland er Jim Ratcliffe sem er einn auðugasti maður Bretlandseyja. Hann á stórveldið Ineos og ekki mál gleyma hlut hans í hinu fornfræga knattspyrnufélagi Manchester United. Gengi þess síðast nefnda hefur ekki verið upp á marga fiska en með kaupum á hlutabréfum í félaginu tekst Jim Ratcliffe á hendur svipuð áskorun og með Atlantshafslaxinn. Hefja félagið í hæstu hæðir á nýjan leik. Á báðum vígstöðvum er verk að vinna og miðað við fyrstu göngur í Vopnafjörðinn virðist Jim vera að gera betur þegar kemur að laxinum en með Manchester United. 

• Blogga um frétt

Seinustu hundraðkallar sumarsins