Veiði | mbl | 26.6.2025 | 9:58

Listinn yfir þá allra stærstu í sumar

Nýtt ár og ný ævintýri. Við erum tilbúin að taka við upplýsingum. Ljósmynd/samsett

Eitt umdeildasta verkefni Sporðakasta er svokallaður hundraðkallalisti þar sem greint er frá allra stærstu löxunum sem veiðast hverju sinni. Þetta er sjötta árið sem listinn er tekinn saman. Einn hundraðkall hefur ratað á listann og veiddist hann í Sandá í Þistilfirði.

Þessi listi hefur orðið tilefni, ekki bara umræðna heldur einnig rifrildis þar sem ýmsar ásakanir hafa fokið. En í grunninn er þetta einfalt. Taka góðar myndir og vanda mælingu ef fiskurinn nær hundrað sentímetrum.

Til að fiskur rati inn á listann þurfa nokkur atriði að vera uppfyllt.

1. Vitni þarf að vera að mælingu á laxinum og staðfesta mælingu. Þetta er ófrávíkjanleg regla.

2. Góðar ljósmyndir eru nauðsynlegar. Vandið myndatökuna. Haldið um stirtluna og grípið um hana með hendinni, þannig að lófinn snúi að myndavélinni. Það fyrsta sem allir veiðimenn skoða er hvort viðkomandi veiðimaður nær utan um stirtluna. Feli menn þetta grip eða hagræði hefur reynslan sýnt að það veldur tortryggni.

3. Takið málbandsmynd af fiskinum. Þær eru ekki endilega til birtingar en slíka staðfesting er án ef einföldust og áhrifaríkust. Þegar fiskurinn er að jafna sig eftir átökin, áður en honum er sleppt er yfirleitt auðvelt að taka slíka mynd. Leggja hann á hliðina þó þannig að hann nái að súpa vatn og leggja málbandið yfir hann.

Sextán laxar komust á listann í fyrra. Þeir voru 29 sumarið 2023 og 30 árið þar á undan. Þetta eru sjaldséðir gestir og eins og gefur að skilja þeir fiskar sem oftast sleppa. Til að landa svo stórum laxi þarf margt að ganga upp.

Fyrsti hundraðkallinn. Eiður Pétursson með 100 sentímetra fiski. Svona er rétt haldið um stirtlu. Ljósmynd/Guðmundur Ingi

Fyrsti hundraðkallinn veiddist í Sandá í Þistilfirði og það var Eiður Pétursson sem veiðigyðjan heiðraði með stórglæsilegum laxi í Ólafshyl. Myndin sem fylgir með fréttinni af Eiði sýnir rétt handtak um stirtlu.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
103 cm	Miðfjarðará	Eduardo	2. júlí 2.7.
100 cm	Sandá í Þistilfirði	Eiður Pétursson	24. júní 24.6.
Veiðiárið 2024:
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.