Það er ekki langt síðan að við vorum frétt um magnaða meðalþyngd í Miðfjarðará. En í morgun veiddist sá stærsti í sumar sem við höfum heyrt af og þetta er jafnframt sá stærsti í mörg ár í Miðfirði.

Carlos leiðsögumaður var með tvo veiðimenn frá Spáni í efri hluta Austurár, sem er svæðið fyrir ofan Kambsfoss. Þar hafa nokkrir stórir gefið sig síðustu daga í annars frekar miklu harki. Veiðistaðurinn Kotálar var vettvangur ævintýrisins sem hinn 16 ára gamli Eduardo átti eftir að upplifa. Langá Fancy hitchtúba varð fyrir valinu og krókur númer sextán.

Carlos sagði í samtali við Sporðaköst að laxinn hefði tekið fljótlega og hann vissi strax að þetta var stór fiskur. „Þetta var risa ólga og Eduardo gerði þetta mjög vel. Beið og beið og svo var hann tekinn,“ sagði glaðlegur Carlos.

Eduardo heldur honum í háfnum, enda er það góð aðferð svo fiskurinn hljóti sem minnstan skaða af. Ljósmynd/Frændinn

Klukkustund og kílómetri

Það varð allt vitlaust. Laxinn tók hvert stökkið á fætur öðru og endaði svo með því að strika niður ána á miklum hraða. „Þessi barátta stóð í um klukkustund og við lönduðum honum kílómetra fyrir neðan veiðistaðinn,“ upplýsti Carlos.

Mikill hængur náðist á endanum í háfinn og þá fyrst sáu viðstaddir, Carlos, Eduardo og eldri frændi hans hversu stór lax var hér á ferðinni. Fiskurinn er langt frá því að vera nýr og gæti hæglega hafa gengið í ána í lok maí. Hann er farinn að taka lit krókurinn að taka á sig mynd í neðri skolti. 

Þetta er mikil sleggja. Mældur 103 sentímetrar og sá stærsti í Miðfirði í þó nokkur ár. Þessi verður orðinn 105 sentímetrar í haust, ef hann veiðist aftur. Ljósmynd/Carlos

„Ég mældi hann fyrst í háfnum og sá þá að hann var yfir hundrað sentímetrar. Við vönduðum okkur við mælinguna og hann reyndist vera 103 sentímetrar. Magnaður fiskur. Eduardo var í vandræðum með að halda laxinum þannig að næðist góð mynd og þeir frændur skiptust á,“ sagði Carlos.

Þegar skoðaður er hundraðkallalistinn sem Sporðaköst halda úti má sjá að svona stór lax hefur ekki veiðst síðustu fimm ár í Miðfirði. Nauðsynlegt er að fara lengra aftur til að finna jafnoka þessa stóra hængs.

Mjög gott vatn er í Miðfirði og vonast menn eftir að göngur fari nú vaxandi og veiði aukist. Þetta hefur verið rólegt framan af.

Tengdar fréttir

Hundraðkallar

Listinn yfir þá allra stærstu í sumar

• Opnuðu Sandá með fyrsta hundraðkallinum
• Einn sá stærsti sem veiðst hefur í sumar
• Nú raðast þeir inn stórlaxarnir
• „Það er komin náttúra í kallana“

» Fleiri tengdar fréttir

• Blogga um frétt

Seinustu hundraðkallar sumarsins