Jón Viktor Gunnarsson
Jón Viktor Gunnarsson
[ Smellið til að sjá stærri mynd ]
11.-13. febrúar

MARGIR skákmenn lögðu leið sína í KEA-salinn, Sunnuhlíð á Akureyri, og tóku þátt í minningarmóti Jóns Björgvinssonar sem lauk á sunnudaginn var. Nokkrir öflugir skákmenn af höfuðborgarsvæðinu tóku þátt sem og rjóminn af norðlenskum skákmönnum. Keppendurnir voru alls 41 þegar mótið hófst sl. föstudag með fjórum atskákum. Stigahæsti skákmaður landsins og félagsmaður í Skákfélagi Akureyrar, stórmeistarinn Jóhann Hjartarson, leiddi mótið eftir fyrsta daginn með fullu húsi vinninga ásamt alþjóðlega meistaranum Jóni Viktori Gunnarssyni. Síðustu þrjár umferðir mótsins voru kappskákir svo að Jóhann og Jón mættust í einni slíkri á laugardagsmorgninum. Bræðrabylta varð í viðureign þeirra og urðu þeim hvorugum á mistök í lokaumferðunum tveim sem þýddi að báðir luku keppni með sex og hálfan vinning af sjö mögulegum. Gripið var til stigaútreikninga og varð Jóhann þá hlutskarpari. Lokastaða efstu manna varð annars þessi:

1.-2. Jóhann Hjartarson og Jón Viktor Gunnarsson 6½ vinning af 7 mögulegum

3.-5. Halldór Brynjar Halldórsson, Björn Þorfinnsson og Guðmundur Gíslason 5 v.

6.-10. Áskell Örn Kárason, Björn Ívar Karlsson, Jón Árni Jónsson, Stefán Bergsson og Ólafur Kristjánsson 4½ v.

11.-20. Jón Þ. Þór, Gylfi Þórhallsson, Sævar Bjarnason, Rúnar Sigurpálsson, Arnar Þorsteinsson, Sigurjón Sigurbjörnsson, Sveinbjörn Sigurðsson, Unnar Þór Bachmann, Tómas Veigar Sigurðarson og Smári Ólafsson 4 v.

Veitt voru verðlaun í ýmsum aukaflokkum og urðu efstu menn þar þessir:

Í flokki skákmanna með 1800-2000 stig: 1. Sigurjón Sigurbjörnsson 4 v. (21,0 Monrad stig) 2. Smári Ólafsson 4 v. (18,5) 3. Guðmundur Freyr Hansson 3,5 v. Í flokki skákmanna með minna en 1799 stig: 1. Sveinbjörn Sigurðsson 4 v. (20,5) 2. Tómas Veigar Sigurðarson 4 v. (20,0) 3. Unnar Þór Bachmann 4 v. (19,0) Í flokki skákmanna 50 ára og eldri: 1. Ólafur Kristjánsson 4,5 (23,5) 2. Áskell Örn Kárason 4,5 (21,5) 3. Jón Þ. Þór 4 v. (26,0) Í unglingaflokki: 1. Ólafur Evert Úlfsson 2,5 v. 2. Davíð Arnarson 1,5 v. 3. Alexander Arnar Þórisson 1 v.

Gylfi Þórhallsson er formaður Skákfélags Akureyrar en það félag hélt mótið ásamt Taflfélagi Dalvíkur, síðasta félaginu sem Jón heitinn Björgvinsson var í. Gylfi hefur marga hildi háð og lengi vel átti hann metið að hafa teflt flestar kappskákir sem reiknaðar voru til skákstiga. Sævar Bjarnason sló það síðan en Gylfi lætur þó ekki deigan síga. Á mótinu mætti hann ofjarli sínum þegar hann mætti sigurvegara mótsins.

Hvítt: Gylfi Þórhallsson (2115)

Svart: Jóhann Hjartarson (2645)

1. e4 e5 2. Rc3 Rc6 3. g3 Bc5 4. Bg2 d6 5. d3 Rge7 6. Rge2 O-O 7. Be3 Bxe3 8. fxe3 Be6 9. Dd2 Dd7 10. d4 Bh3 11. Bxh3 Dxh3

Byrjunartaflmennska hvíts hefur verið þróttlítil og stendur svartur aðeins betur að vígi. Hann hefur skorðað peð hvíts á kóngsvæng með drottningu sinni og staðsetning hennar kemur í veg fyrir að hvítur geti hrókerað stutt. Í framhaldinu finnur hvítur ekki haldbæra áætlun til að bæta stöðu sína.

Sjá stöðumynd 1

12. O-O-O f6 13. Hdg1?!

Hér hefði verið nærtækt að leika 13. Rg1 koma riddaranum fyrir á f3. Svartur gæti þá reynt að sporna við því með að leika 13...Dg4 eða 13...Dh5 en þá hefði endataflið eftir 14. De2 Dxe2 15. Rgxe2 verið u.þ.b. í járnum.

13...f5 14. d5 Rb4 15. a3 Ra6 16. exf5 Hxf5 17. g4 Hf2 18. Hg3 Dh4 19. h3 Haf8 20. b4! Hf1+ 21. Hxf1 Hxf1+ 22. Kb2 Rc8!? 23. Dd3 Rb6

Svörtum hefur tekist að halda í frumkvæðið sitt og felst það nú í yfirráðum svarts á f-línunni. Hvítur á erfitt með að koma riddurum sínum á hreyfingu en riddarameistarinn Benóný Benediktsson sagði að þeir ættu aldrei að valda hvor annan.

Sjá stöðumynd 2

24. e4?

Hér hafði 24. Re4 komið vel til álita þar sem 24...Ra4+ væri vel svarað með 25. Kb3. Eftir textaleikinn girðir hvítur fyrir að hann geti notað e4-reitinn fyrir menn sína og veikir svörtu reitina í stöðu sinni.

24...Df6! 25. Db5 Df8 26. a4 c6! 27. dxc6 Rc7 28. Dd3 bxc6 29. He3?

Afleikur sem tapar skákinni strax. Engu að síður var hvíta staðan erfið sem sést best á því að 29. a5 hefði verið svarað með 29...d5.

Sjá stöðumynd 3

29... d5! 30. Rg3 Dxb4+ 31. Ka2 Rc4 og svartur gafst upp enda verður mát ekki umflúið.

Það var afar vel til fundið hjá norðanmönnum að halda mót þetta og sannarlega gott tilefni að heiðra minningu þess sterka skákmanns sem Jón Björgvinsson var.

Gengi Stefáns og Ingvars að batna í Búdapest

Skákmennirnir Stefán Kristjánsson (2438) og Ingvar Jóhannesson (2315) tefla enn í Fyrsta laugardagsmóti í Búdapest og hafa báðir landað sínum fyrsta vinningi úr einni skák. Stefán, sem tekur þátt í stórmeistaraflokki, lagði Andras Flumbort (2479) í sjöttu umferð og hefur þrjá vinninga eftir að hafa teflt sex skákir. Ingvar gerði fimm jafntefli í röð í fyrstu umferðum mótsins en vann svo þýska skákmanninn Hubertus Schulze í sinni sjöttu skák. Hann hefur því þrjá og hálfan vinning af sex mögulegum en alls mun hann tefla 10 skákir í sínum flokki en Stefán tólf. Hægt er að fylgjast með gangi mótsins á www.skak.is eða www.firstsaturday.hu.

Þrír íslenskir skákmenn tefla í Frakklandi

Stórmeistararnir Hannes Hlífar Stefánsson (2561) og Þröstur Þórhallsson (2455) taka þátt ásamt Magnúsi Kristinssyni (1430) í skákhátíð sem fram fer dagana 12. til 20. febrúar í smábænum Capelle La Grande í Frakklandi. Um afar öflugt mót er að ræða sem haldið er á hverju ári en steinsnar frá bænum er hinn sögufrægi staður Dunkerque. Eftir 2 umferðir hefur Hannes 1½ vinning en Þröstur og Magnús hafa vinning hvor. Stigahæsti keppandi mótsins er Murtas Kazhgaleyev (2613) en Hannes er þar tuttugasti í röðinni. Hægt er að fylgjast með gangi mála á www.skak.is eða www.cappelle-chess.com.

HELGI ÁSS GRÉTARSSON