[ Smellið til að sjá stærri mynd ]
POPPDROTTNINGIN, leikkonan og upprennandi fatahönnuðurinn Jennifer Lopez tók í fyrsta sinn þátt í tískuvikunni í New York með sýningu um helgina.

POPPDROTTNINGIN, leikkonan og upprennandi fatahönnuðurinn Jennifer Lopez tók í fyrsta sinn þátt í tískuvikunni í New York með sýningu um helgina. Markaði sýningin á fatalínu hennar, Sweetface, endalokin á tískuvikunni á haust- og vetrartískunni fyrir næsta vetur. Alls tóku um 60 hönnuðir þátt í tískuvikunni. Sweetface-sýningin einkenndist af leikrænum tilburðum enda eru sýningar hönnuða á borð við Alexander McQueen og John Galliano í uppáhaldi hjá henni.

Lopez hefur tekið virkan þátt í hönnunarferlinu frá því síðasta haust en þá hætti listrænn stjórnandi fyrirtækis hennar, Heather Thomson, og fór að vinna við nýja fatalínu Beyonce Knowles. Fötin endurspegluðu smekk Lopez og lífsstíl hennar og var nóg af loðfeldum í sýningunni. Undir lokin heyrðust svo tónar af væntanlegari plötu Lopez, Rebirth , sem kemur út 1. mars næstkomandi.

Fötunum var vel tekið af fullu húsi af gestum en margar stjörnur voru í húsinu. Sweetface er þroskaðri lína heldur en JLo-línan sem hún býður nú þegar til sölu. Nýja línan verður dýrari og verður dreifing ekki eins víðtæk og JLo-fötunum.

Lopez er líka komin með eigin undirfatalínu og hefur sala á ilmvötnum hennar gengið vel. Nýjasta ilmvatnið var að koma á markað og ber það nafnið Miami Glow.

ingarun@mbl.is