— Morgunblaðið/Þorkell
[ Smellið til að sjá stærri mynd ]
Það er ekkert óvenjulegt við að kirkjugestir fái sér kaffi saman að loknu helgihaldi en starfsfólk og prestar í Neskirkju létu það ekki nægja heldur opnuðu kaffihús sem má kalla "kaffihús í sókn".

Í NESKIRKJU hefur frá haustdögum verið starfrækt kaffihús en það er sennilega eina kirkjukaffihús landsins. Örn Bárður Jónsson sóknarprestur segir að kaffihúsið sé liður í breyttri starfsemi Neskirkju eftir að nýbygging kirkjunnar var tekin í notkun.

Mikil hugmyndavinna er að baki nýbyggingunni en Örn segir að hún sé hugsuð eins og nokkurs konar yfirbyggt torg. "Í stað þess að byggja hefðbundið safnaðarheimili er þetta hugsað eins og í borgum erlendis þar sem kirkjan er við torgið en úti eru kaffihúsin, veitingahúsin og mannlífið. Hér getur fólk komið saman að degi til og fengið sér kaffi," segir Örn og bætir við að á kaffihúsinu sé m.a. þráðlaust net, dagblöð og tímarit.

"Hér mætast eiginlega himinn og jörð. Fólk er að fara inn og út úr kirkjunni og hér er nokkurs konar borgarstemning," segir Örn og Sigurður Árni Þórðarson, safnaðarprestur bætir við: "Þetta er sannkallað kaffihús í sókn."

Í nýbyggingunni eru salir með færanlegum veggjum svo þeir geta verið misstórir. Þar er jafnframt bókabúð en Örn segir að þarna sé verið að líkja eftir göngugötu.

Trúin varðar daglegt líf

Starfið í Neskirkju er fjölbreytt og Örn segir að fólk staldri venjulega við eftir hvers kyns samkomur í kirkjunni og fái sér kaffi. Þá líta margir inn í hádeginu og fá sér súpu og spjalla við prestana eða gesti og gangandi. "Fyrir nokkru vorum við alltaf með stutta fyrirlestra í hádeginu á fimmtudögum. Þá tókum við fyrir ýmis málefni þar sem við reyndum að tengja trú og þjóðlíf. Fyrirlestrarnir voru í um fimmtán mínútur og síðan voru umræður um efnið. Þetta gafst vel en við erum að reyna að skapa umræðu um að trú sé ekki bara lokuð af inni í helgirýminu heldur varði hún líka daglegt líf á jörðinni, skilning okkar á þjóðfélaginu, siðfræði og fleira," segir Örn.