Söngvarinn Shin leiðir níu manna hljómsveitina DCS en lífleg sviðsframkoma og tónlistarflutningur er aðalsmerki hennar.
Söngvarinn Shin leiðir níu manna hljómsveitina DCS en lífleg sviðsframkoma og tónlistarflutningur er aðalsmerki hennar.
[ Smellið til að sjá stærri mynd ]
Íslendingar fá um næstu helgi tækifæri til þess að kynnast hinni fjörugu tónlistarstefnu bhangra, sem ættuð er frá Indlandi. Hljómsveitin DCS spilar bhangra-tónlist með breskum menningaráhrifum en Inga Rún Sigurðardóttir ræddi við Shin, söngvara sveitarinnar.

Níu manna hljómsveit sem spilar bhangra-tónlist leikur á Nasa föstudaginn 18. febrúar og eru tónleikarnir hluti af dagskrá Vetrarhátíðar í Reykjavík. Shin er söngvari þessarar líflegu sveitar og fellst góðfúslega á að útskýra fyrir lesendum Morgunblaðsins uppruna bhangra.

"Bhangra-tónlist er form tónlistar og dans sem kemur frá Punjab-héraði á Indlandi. Þetta er þjóðlagadans og tónlist sem fólk flytur og syngur í kringum uppskerutíma á Indlandi. Tónlistin byggist á stórri viðartrommu sem er eins og tunna með geitaskinni á báðum endum. Það er spilað með tveimur kjuðum á hana en þessi tromma heitir dhol. Takturinn sem er spilaður á dhol er takturinn sem fólk dansar við í bhangra-tónlist," útskýrir Shin.

"Við erum tónleikasveit og einbeitum okkur því að tónlistinni fremur en dansinum. Ég hoppa um á sviðinu og hreyfi mig en nota ekki mikið af hefðbundnum Punjabi-danshreyfingum. Það eru til danshópar hér á Bretlandi sem dansa þetta í fullum glimmerskrúða en DCS einbeitir sér að tónlistinni," segir hann og tekur til við að útskýra önnur hljóðfæri sem koma við sögu.

Tabla og plötuspilari

"Við erum með dhol í sveitinni og dholak, sem er minni útgáfa trommunnar, en það er spilað á hana með höndunum. Svo notum við tabla. Einnig spilum við á ýmis vestræn hjóðfæri eins og trommur, gítar, bassa og hljómborð. Það er líka plötusnúður sem skífuskankar og spilar með hjómsveitinni á tónleikum," segir Shin og útskýrir hvernig bresku áhrifin koma inn í þessa tónlist sem að uppruna er indversk.

"Við erum Punjab-fólk sem fæddist hér í Bretlandi, við erum allir þriðja eða fjórða kynslóð. Við erum menntaðir í breska menntakerfinu og erum breskir ríkisborgarar. Við höfum orðið fyrir áhrifum frá öllu því breska sem er í kringum okkur. Við tökum það besta úr breskri menningu og tónlist og það besta úr punjabskri menningu og tónlist og blöndum þessu tvennu saman. Við höfum myndað okkar eigin bhangra-hljóm, sem kallast breskt-asískt bhangra," segir hann en meðlimir DCS hafa óhræddir drukkið í sig hinar ýmsu tónlistarstefnur.

"DCS er ein af fyrstu hljómsveitunum sem fóru að nota vestræn áhrif í bhangra-tónlist. Við notuðum við reggí og danstónlist strax snemma á tíunda áratugnum," segir Shin en hljómsveitin hefur starfað í tuttugu ár.

Eldra fólk frá Punjab var ekki ánægt með þetta. "Það óttaðist áhrif frá tónlist sem það þekkti ekki neitt. Það hélt að við værum að reyna að spilla tónlistinni og spilla unga fólkinu. En við vorum ekki að spilla tónlistinni, við vorum að koma með nýja áhrifavalda inn og skilgreina tónlistina upp á nýtt. Þetta var eitthvað sem við gátum samsamað okkur við. Ég hlusta á mikið af nýjustu tónlistinni sem er í gangi hverju sinni og líka bhangra-tónlist og blanda þessu tvennu saman, annað er ekki hægt," útskýrir Shin og þetta heyrist vel á nýjustu diskum sveitarinnar, Punjabi Dance Nation og Old Skool /Nu Skool DCS Flava .

Bhangra-tónlist vinsæl

Hann samsinnir því að með þessu hafi bhangra náð til fleira fólks og hafa vinsældir þessarar tónlistar aukist á síðustu árum. Sem dæmi má nefna lagið "Mundian to Bach Ke" með Panjabi MC, sem var m.a.s. mikið spilað í íslensku útvarpi.

"Það er mikill áhugi á bhangra-tónlist út um allt núna."

Shin segir að hljómsveitin ferðist þrisvar til fjórum sinnum á ári til meginlands Evrópu, til landa á borð við Þýskaland, Sviss og Holland. "Þessi ferðalög eru frábær. Fólk virðist elska bhangra-tónlist," segir Shin en DCS er spennt fyrir Íslandsförinni og því að kynna Íslendingum bhangra-tónlist.

Landinn á von á góðu því DCS hefur margoft fengið verðlaun sem besta bhangra-sveitin á tónleikum. "Við erum með hráa orku á sviði og virkjum áhorfendurna. Ég vona að við eigum eftir að koma fólki skemmtilega á óvart."

ingarun@mbl.is