Frá setningu mótsins í Paks. Kortsnoj, fyrir miðju, hefur á mótinu bæði unnið Sutovsky, t.h. og Acs, t.v.
Frá setningu mótsins í Paks. Kortsnoj, fyrir miðju, hefur á mótinu bæði unnið Sutovsky, t.h. og Acs, t.v.
[ Smellið til að sjá stærri mynd ]
SKÁKSAMBAND Íslands hefur rekið tímaritið Skák í þó nokkur ár en það tók við rekstrinum eftir að hinn ötuli hugsjónamaður og ritstjóri tímaritsins, Jóhann Þórir Jónsson, veiktist alvarlega síðla árs 1997.
SKÁKSAMBAND Íslands hefur rekið tímaritið Skák í þó nokkur ár en það tók við rekstrinum eftir að hinn ötuli hugsjónamaður og ritstjóri tímaritsins, Jóhann Þórir Jónsson, veiktist alvarlega síðla árs 1997. Rekstur tímaritsins hefur gengið brösuglega og undanfarin ár hefur hann létt pyngju sambandsins að meðaltali um hálfa milljón á ári. Á síðustu aðalfundum Skáksambands Íslands hafa sprottið upp umræður um stöðu tímaritsins en niðurstaðan hefur alltaf verið sú að samskonar blað kemur út á hverju ári. Alls koma út átta tölublöð á ári og inniheldur hvert blað fróðleik um ýmsa þætti skákarinnar. Þó að fjallað sé um mót sem hafa verið haldin innanlands og erlendis þá er megináherslan lögð á að fjalla um skáksöguna. Í hverju blaði er fjallað um gamla íslenska meistara og viðburði sem tengjast fortíðinni með einum eða öðrum hætti. Ritstjórnarpistlar hvers blaðs bera keim af sömu áherslum - af þeim að dæma virðist sem allt hafi verið miklu betra í gamla daga en í nútímanum. Þessi fortíðarþrá virðist einkenna marga aðila í íslenskum skákheimi. Þegar öflug alþjóðleg skákmót eru haldin og fremstu meistarar heims mæta til leiks er megináherslan lögð á að fá þá meistara íslensku sem eru hættir taflmennsku en ekki þá sem eru að vaxa úr grasi og eru að tefla af fullum krafti. Röksemdin fyrir þessu er að sjálfsögðu sú að þeir gömlu eru betri en þeir yngri. Hugsanlega má það til sanns vegar færa en um það getur oft verið erfitt að fullyrða - þeir gömlu eru jú hættir að tefla og tefla því sjaldan við þá yngri. Fleiri atriði mætti tína til sem bera vott um að sumir innan skákhreyfingarinnar eru fastir í hjólförum gamalla tíma. Ekki er ástæða til að nefna þau öll hér - aðalatriðið er að hugsunarhátturinn getur hamlað framförum og leitt af sér vantrú á þeim sem erfa eiga skákmenninguna. Það er óskynsamlegt að festast í fortíðarhyggju rétt eins og það er óheillavænlegt að hagnýta sér ekki þekkingu sem sagan hefur að geyma. Mest er um vert að tengja þess tvo þætti saman svo að hægt sé að byggja upp öfluga framtíð. Þessar vangaveltur má heimfæra upp á skákstíl skákmanna. Sumir skákmenn tileinka sér ekki nýjungar en þekkja skákir gömlu meistaranna vel á meðan aðrir eru vel upplýstir um nýjustu hugmyndirnar en þekkja ekki sígildar skákir. Að sjálfsögðu skiptir hvorttveggja máli en aldur skákmannsins ekki. Hugarfarið og vinnubrögðin er það sem öllu máli skiptir. Lifandi sönnun þessa er hinn 74 ára Viktor Korsnoj (2.619) sem tekur nú þátt í sex manna skákmóti í Paks í Ungverjalandi. Meðalstig keppenda er 2.616 stig en meðalaldur annarra en Korsnojs er 25 ár. Þegar þessar línur eru ritaðar hefur Viktor grimmi unnið þrjár skákir og gert eitt jafntefli. Hann leiðir mótið en ungverski stórmeistarinn Zoltan Almasi (2.628) kemur næstur með þrjá vinninga. Í fjórðu umferð mætti Viktor hinum sókndjarfa ísraelska stórmeistara Emil Sutovsky (2.665).

Hvítt: Viktor Korsnoj (2.619)

Svart: Emil Sutovsky (2.665)

1. c4 Rf6 2. g3 c6 3. Rf3 d5 4. b3 Bg4 5. Re5!? Bf5 6. Bg2 Rbd7 7. d4 e6 8. 0-0 Bd6 9. Bb2 Dc7 10. Rd3 h5!?

Dæmigerður leikur fyrir Sutovsky. Rólegri sálir hefðu kosið að fara með h-peðið einn reit fram eða hrókerað stutt.

11. c5! Be7 12. b4 h4 13. Rd2 Rg4?! 14. h3

Með næsta leik brennur svartur allar brýr að baki sér. Að hörfa með riddarann til baka hefði þýtt að hvítur stæði aðeins betur að vígi eftir 15. g4.

14. ... hxg3

Svartur fær mótspil eftir þessa mannsfórn en það virðist ekki duga.

15. hxg4 gxf2+ 16. Hxf2 Dh2+ 17. Kf1 Bxg4 18. Rf3 Bxf3 19. Bxf3 Dh3+ 20. Bg2 Dg3 21. Hf3 Dh2 22. Rf2 Hh5

Hér virðist sem svartur hafi haft eitthvað upp úr krafsinu eftir mannsfórnina. Þannig virðist sem hann geti undirbúið áætlun eins og þá að storma með kóngsvængspeð sín fram á völlinn. Næstu leikir hvíts gera honum það erfitt um vik.

23. Bc1! Bg5

23. ...g5 hefði verið svarað með 24. Dd3.

24. Hh3! Hxh3 25. Rxh3 Bxc1 26. Dxc1 e5 27. Dg5!

Taflið er nú unnið á hvítt þar sem honum hefur tekist að skipta upp liði og koma í veg fyrir að svartur fái nokkra sókn.

27. ...exd4 28. Dxg7 De5 29. Dxe5+ Rxe5 30. Hd1 a5 31. b5 Rd7 32. Rf4 Rxc5 33. bxc6 bxc6 34. Hc1 Re6 35. Rxe6 fxe6 36. Hxc6

Staðan er nú tæknilega unnin á hvítt og innbyrti hann vinninginn eftir 68 leiki. 36. ...Kd7 37. Hb6 Hc8 38. Bh3 Hc1+ 39. Kf2 Hc2 40. Hxe6 Kc7 41. Bf5 Hxa2 42. Bd3 Ha1 43. Kf3 Hf1+ 44. Kg4 a4 45. Ha6 a3 46. Hxa3 Kd6 47. Ha8 Ke6 48. Bf5+ Kd6 49. Ha6+ Ke7 50. He6+ Kd7 51. Kg5 Hf2 52. Bg4 Hg2 53. He4+ Kd6 54. Hxd4 Ke5 55. Hd3 d4 56. Kh4 Hg1 57. Kh3 Ke4 58. Bf3+ Ke5 59. Kh2 Hg7 60. Bg2 Hg8 61. Kg1 Hf8 62. Bf3 Hf6 63. Kf2 Ha6 64. Hb3 Ha1 65. Hb5+ Kf4 66. Hb8 Hd1 67. He8 Kg5 68. Be4 og svartur gafst upp. Hægt er að fylgjast með gangi mótsins á vefsíðunni http://ase.hu/marxgy/online.htm en því lýkur 22. júní næstkomandi.

Sævar varð efstur á Skákþingi Hafnarfjarðar

Um síðustu helgi fór fram Skákþing Hafnarfjarðar í íþróttamiðstöðinni á Ásvöllum. Alls tóku níu skákmenn þátt í mótinu og voru sjö umferðir tefldar. Sævar Bjarnason (2.284), alþjóðlegur meistari, varð hlutskarpastur á mótinu með 6½ vinning af sjö mögulegum. Lokastaða mótsins varð annars þessi:

1. Sævar Bjarnason 6½ v.

2.-3. Þorvarður F. Ólafsson (2.126) og Páll Sigurðsson (1.914)

4.-6. Svanberg Már Pálsson (1.505), Sverrir Þorgeirsson (1.946) og Ingi Tandri Traustason (1.560) 4 v.

7. Sveinn Arnarsson (1610) 3 v.

8. Snorri Sigurður Karlsson (1.450) 2½ v.

9. Kristján Ari Sigurðsson 1 v.

Þar sem Sævar býr ekki í Hafnarfirði þurfa Þorvarður og Páll að heyja einvígi um titilinn Skákmeistari Hafnarfjarðar. Á meðan á mótinu stóð hafði heimasíða Hauka að geyma líflegar frásagnir af mótinu og var það vel til fundið.

Evrópukeppni einstaklinga

Þessa dagana situr Lenka Ptácníkova að tafli í Moldavíu á Evrópumeistaramóti kvenna. Að fimm umferðum loknum hefur hún tvo vinninga af fimm mögulegum. Margar öflugar skákkonur taka þátt í mótinu og er hin 16 ára Kateryna Lahno (2.467) efst með 4½ vinning. Á þjóðhátíðardag Íslendinga, 17. júní, hefst Evrópukeppni einstaklinga í Varsjá í Póllandi. Margir af öflugustu skákmönnum heims taka þátt í mótinu, m.a. Vassily Ivansjúk (2.739). Nokkrir Íslendingar verða á meðal keppenda, þ.e. stórmeistarinn Hannes Hlífar Stefánsson (2.567) og alþjóðlegu meistararnir Stefán Kristjánsson (2.461) og Bragi Þorfinnsson (2.442). Hægt er að fylgjast með báðum þessum mótum á vefsíðunni www.skak.is.

HELGI ÁSS GRÉTARSSON