Kirkjuklukkurnar fimm sem nú hringja í turni Reykholtskirkju eru frá ýmsum tímum.
Kirkjuklukkurnar fimm sem nú hringja í turni Reykholtskirkju eru frá ýmsum tímum.
[ Smellið til að sjá stærri mynd ]
Eftir Láru Gísladóttur Reykholt | Við messu í Reykholtskirkju í Borgarfirði í gær var klukkum hringt í fyrsta sinn í turni kirkjunnar. Sr. Geir Waage er sóknarprestur í Reykholti.
Eftir Láru Gísladóttur

Reykholt | Við messu í Reykholtskirkju í Borgarfirði í gær var klukkum hringt í fyrsta sinn í turni kirkjunnar. Sr. Geir Waage er sóknarprestur í Reykholti. Til þessa hefur verið hringt frammi við kirkjudyr þar sem turninn var óinnréttaður. Í turninum eru nú búið að koma fyrir 5 klukkum, auk skólabjöllu Héraðsskólans í Reykholti.

Tvær klukknanna eru þær sem notaðar hafa verið í Reykholtskirkju til þessa, önnur frá miðöldum en á hina er letrað ártalið 1745.

Aðrar tvær klukkur koma úr Hallgrímskirkju í Saurbæ, en sr. Jón Einarsson fyrrum sóknarprestur þar ráðstafaði klukkunum til Reykholts á sínum tíma. Önnur er frá 1739 en hin líklega frá 15. eða 16. öld. Þær höfðu þá verið ónotaðar frá byggingu Hallgrímskirkju. Einnig var sett upp ný klukka sem smíðuð var sérstaklega fyrir Reykholtskirkju.

Velgjörðarmaður kirkjunnar, norski kaupsýslumaðurinn og skipaútgerðamaðurinn Jan Petter Røed, kostaði innréttingu í turninn og allan búnað til að hringja, ásamt nýju klukkunni. Røed var viðstaddur athöfnina ásamt Alison, eiginkonu sinni. Hann hefur áður styrkt kirkjubygginguna veglega með því að greiða niður skuldir hennar.

Að sögn sr. Geirs Waage, sóknarprests í Reykholti, hófust tengsl við Norðmanninn með þeim hætti að hann heimsótti Reykholt í fyrstu Íslandsheimsókn sinni fyrir nokkrum árum og hreifst mjög af þeirri uppbyggingu sem þar hafði átt sér stað. Áttu þeir Geir langt spjall saman, meðal annars um fjárhagsstöðu kirkjunnar. Uppúr þessari heimsókn varð mikill vinskapur. Geir segir Røed afar vel lesinn í fornbókmenntunum okkar og vel að sér um íslensk þjóðfélagsmál og dáist hann að árangi Íslendinga á mörgum sviðum. Hann sé hrifinn af því frelsi og þeim gangi sem hér sé í viðskiptalífinu. Geir sagðist eitt sinn hafa spurt hann að því hvers vegna hann væri svo örlátur, en svarið var: you earn - you learn - you return. Hann telur sem sé að þeim sem vegnar vel og gengur vel, beri skylda til að láta gott af sér leiða.

Geir var að vonum ánægður með daginn en sagði nú standa yfir söfnun fyrir næsta áfanga, en það er að koma upp steindum gluggum í hliðarstúkur kirkjunnar. Vonast hann til að þeir verði komnir upp fyrir 10 ára vígsluafmæli kirkjunnar á Ólafsmessu í sumar.

Gefin hafa verið út kort með myndum af stafngluggum kirkjunnar sem settir voru upp í júlí 2003. Kortin eru seld til styrktar uppsetningu glugganna í hliðarstúkur. Höfundur glugganna er Valgerður Bergsdóttir myndlistarmaður. Myndir af þeim má sjá á heimasíðu Reykholts, www.reykholt.is., en þeir taka á sig ýmsar myndir eftir birtuskilyrðum úti og inni.

Geir segir mikið um að vera í kirkjunni. Sl. laugardag fóru fram árlegir aðventutónleikar Reykholtskirkju, Tónlistarfélags Borgarfjarðar og Borgarfjarðarprófastsdæmis, þar sem Óperukór Hafnarfjarðar söng undir stjórn Elínar Óskar Óskarsdóttir.

Hinn 8. des nk. býður svo Sparisjóður Mýrasýslu til stórtónleika þar sem fram koma m.a. 8 kórar úr héraðinu. Sparisjóðurinn hefur um árabil stutt dyggilega við alla uppbyggingu og menningarstarf í Reykholti að sögn sr. Geirs. Hann kostaði m.a. prentun fyrrnefndra korta af kirkjugluggunum.

Messan var vel sótt enda veður hið besta, bjart og stillt.