BRIDS - Guðmundur Páll Arnarson | dagbok@mbl.is

Íslandsmótið.

Furðu margir unnu fjögur hjörtu í þessu spili frá fyrstu umferð Íslandsmótsins.

AV eiga greinilega tvo slagi á lauf og ættu síðan að fá aðra tvo á tígul í fyllingu tímans. Hvað fór úrskeiðis í vörninni?

Sumir völdu að spila út tígulgosa með slæmum árangri. En útspil í spaða er heldur ekki hættulaust ef sagnhafi er í stuði. Sér lesandinn vinningsvon eftir spaðadrottningu út?

Hún er til og byggist á því að trompa út spaðann og senda vörnina inn á lauf. En þá verður að taka strax tvo efstu í spaða og stinga spaða hátt. Aftrompa vörnina í tveimur umferðum og trompa síðasta spaðann. Spila loks laufi.

Vörnin getur tekið tvo slagi á lauf, en neyðist svo til að hreyfa tígulinn. Og þá reynir á hittni sagnhafa. Sennilega er besta vörnin sú að vestur taki síðari laufslaginn og skipti yfir í tígultíu, en ef sagnhafi er á skotskónum getur hann unnið spilið.

Eina vörnin sem virkilega dugar er að taka fyrst tvo slagi á lauf og spila síðan spaða eða trompi. Þá verður sagnhafi sjálfur að verka tígulinn.