— Morgunblaðið/Árni Sæberg
Hundinum Trygg, sem á myndinni sést aðstoða mann við að fara úr sokk, er ýmislegt fleira til lista lagt, enda gegnir hann þeim virðulega starfstitli þjónustuhundur.

Hundinum Trygg, sem á myndinni sést aðstoða mann við að fara úr sokk, er ýmislegt fleira til lista lagt, enda gegnir hann þeim virðulega starfstitli þjónustuhundur. Að sögn Auðar Björnsdóttur hundaþjálfara, sem þjálfaði Trygg, geta hundar eins og hann verið góðar hjálparhellur fatlaðra einstaklinga. "Hundarnir geta opnað dyr, kveikt ljós, aðstoðað fólk við að afklæðast, og sótt allt sem það missir, allt niður í smáhluti á borð við kreditkort og lykla," segir Auður. Þá geti þjónustuhundar sett þvott í þvottavél og tekið úr þeim, hjálpað til við að draga hjólastóla og ýmislegt fleira.

Hundurinn Tryggur er í eigu Viðars Sigurðssonar, níu ára sonar Auðar, sem er fatlaður. Þeir Tryggur og Viðar hafa verið góðir félagar undanfarin fimm ár, en um sex mánuði tók að þjálfa Trygg upp í það hlutverk sem hann gegnir. Auður segir að einn annar þjónustuhundur sé til á landinu, en tveir til viðbótar bíði þjálfunar. Verið sé að þrýsta á Tryggingastofnun að leggja til fé vegna þjálfunar hjálparhunda, enda sé hún dýr.