INGIMUNDUR Ingimundarson handknattleiksmaður hefur gert tveggja ára samning við danska úrvalsdeildarfélagið Ajax Heros. Hann lék með Pfadi Winterthur í Sviss síðasta vetur en er uppalinn í röðum ÍR-inga og lék með liði félagsins árum saman.
INGIMUNDUR Ingimundarson handknattleiksmaður hefur gert tveggja ára samning við danska úrvalsdeildarfélagið Ajax Heros. Hann lék með Pfadi Winterthur í Sviss síðasta vetur en er uppalinn í röðum ÍR-inga og lék með liði félagsins árum saman. Erfið meiðsli í hné settu strik í reikninginn hjá Ingimundi síðasta vetur og missti hann af hluta keppnistímabilsins í Sviss af þeim sökum. Fór hann m.a. í speglun á hnénu. Ingimundur sagði í samtali við Morgunblaðið að því miður sæi ekki fyrir endann á meiðslunum í hnénu en hann vonaðist til þess að það myndi jafna sig á næstunni. "Þrátt fyrir að ég hafi gert samning við Ajax þá er alveg ljóst að ég fer ekki til félagsins nema hnéð verði í lagi," sagði Ingimundur sem lék með íslenska landsliðinu á HM í Túnis fyrir hálfu öðru ári.