— Mogunblaðið /Alfons
Ólafsvík | Áhyggjufullir bæjarbúar höfðu samband við fréttaritara Morgunblaðsins í Ólafsvík og bentu á að stórvirkar vinnuvélar væru að róta í hlíðum Ólafsvíkurennis.

Ólafsvík | Áhyggjufullir bæjarbúar höfðu samband við fréttaritara Morgunblaðsins í Ólafsvík og bentu á að stórvirkar vinnuvélar væru að róta í hlíðum Ólafsvíkurennis. Höfðu menn áhyggjur af því að nú væri verið að stækka sárið sem varð eftir að efni var tekið þarna til hafnargerðar í Ólafsvík á árunum 1958-1964. Hið rétta er hinsvegar að Framfarafélagið, Ólafsvíkurdeild, í samstarfi við Hafnarsjóð, hefur unnið að því undanfarin misseri að fjármagn fáist til að laga sárið í Enninu.

Það fjármagn hefur nú fengist og var verktakafyrirtækið Stafnafell fengið til að laga til ummerki eftir efnistökuna. Næsta vor verða svo gerðar ráðstafanir til að auka gróður á svæðinu svo að það falli sem best að umhverfinu. Framfarafélagið er einnig að láta útbúa sjónskífu sem sett verður upp á Bekknum og um leið verður aðgengi bætt og komið upp aðstöðu svo að hægt sé að njóta útsýnis og umhverfis.