[ Smellið til að sjá stærri mynd ]
"Um jólin ættum við að leggja okkur fram um að skapa fallegar hefðir og vera með fólkinu okkar í rólegheitum," segir Sigrún Gunnarsdóttir, nemi í Waldorf-uppeldisfræði og verslunarkona í Börnum náttúrunnar í samtali við Unni H. Jóhannsdóttur.

Sigrún Gunnarsdóttirhefur undanfarin ár föndrað afar frumleg jólakort með með dætrum sínum, Ynju Blæ, 8 ára, Köru Lind, 5 ára og Þulu Gló, 2 ára og sent vinum og vandamönnum "Það má eiginlega segja að þetta séu hálfgerð jólabögglakort, umslagið er alltaf bólgið," segir hún hlæjandi. Sigrún segir bögglakortagerðina hafa byrjað fyrir nokkrum árum en játar samt að hafa alltaf verið mikið föndurfljóð. "Elsta stelpan mín var að verða eins árs og þar sem ég var heimavinnandi hafði ég meiri tíma en áður. Ég er heldur ekki frá því að móðurhlutverkið leysi líka úr læðingi skapandi krafta. Þegar fyrstu jólin hennar nálguðust gleymdi ég mér í alls kyns jólaföndri og naut hverrar stundar. Amma mín, sem fylgdist með þessu föndri mínu, spurði mig hvort ég gæti ekki gert jólakort fyrir þau afa. Það var auðvitað auðsótt mál en ég vildi búa til kort sem myndi verða minnisvarði lengur en þessi einu jól og þess virði að vera tekið upp árið eftir og jafnvel þar á eftir líka. Ég tók því ljósmynd af ömmu og afa og setti hana í ramma sem ég bjó til úr pappamassa, málaði og skreytti. Í hann hengdi ég síðan borða svo úr varð jólaskraut.

Eins og vænta mátti vakti jólakortið mikla lukku á meðal vina og ættingja og það var eftirvænting eftir næsta jólabögglakorti frá ömmu, afa og Sigrúnu. ,,Já, já nú þurftum við að standa undir væntingum," segir hún hlæjandi. ,,Árið eftir lét ég þrykkja aðra mynd af ömmu og afa, þar sem þau voru rétt komin af táningsaldri, á organza-efni, saumaði poka úr því og fyllti af Lavender-jurtum. Síðan kom eldspýtustokkurinn en hann var fyrir mig og mína fjölskyldu," segir hún glettin á svip og það er eins og hún ætli að strjúka ímyndaðan svita af enninu. ,,Það var svo mikil vinna að gera hann svo ég ákvað að láta það jólabögglakort gilda í tvö jól og stóð við það og skrifaði gildistímann á umslagið! Þetta er líka uppáhaldskortið mitt. Mig langaði að gera kort sem væri í anda jólanna og hvað er jólalegra en jesúbarnið í jötunni? En um leið langaði mig að senda mynd af dætrum mínum, sem þegar þarna var komið sögu voru orðnar tvær, því margir vandamanna og vina áttu enga af þeim."

Sigrún leggur áherslu á að ekkert af jólabögglakortunum hafi verið dýrt í framleiðslu. ,,Gerð þeirra kostaði sáralítið, en vinnan hefur oft verið töluverð. Stundirnar sem fara í þau eru samt ánægjulegar og eru ein af hefðum fjölskyldunnar fyrir jólin, sérstaklega dætranna sem fá stærra hlutverk í gerð kortanna eftir því sem þær verða eldri. Mér finnst mjög mikilvægt að styrkja og styðja við ímyndunarafl, sköpunargáfu og þroska barna í gegnum leik, listræna tjáningu, hreyfingu og upplifun."

uhj@mbl.is