FORSETI Íslands, Ólafur Ragnar Grímsson, hefur þegið boð um að taka sæti í þróunarráði Indlands.

FORSETI Íslands, Ólafur Ragnar Grímsson, hefur þegið boð um að taka sæti í þróunarráði Indlands. Ráðinu er ætlað að móta tillögur um á hvern hátt Indverjar geta styrkt efnahagslíf sitt og velferð þjóðarinnar án þess að umhverfi bíði varanlegt tjón af eða gæðum náttúrunnar verði stefnt í hættu. Slíkri sjálfbærri þróun er ætlaður forgangur í stefnumótun.

Þróunarráðið hélt sinn fyrsta fund í Delhi á mánudag. Í frétt frá skrifstofu forseta Íslands kemur fram að ráðið skipa þekktir vísindamenn, sérfræðingar, stjórnendur rannsóknarstofnana og forystumenn á alþjóðavettvangi ásamt áhrifamönnum í indverskum þjóðmálum. Meðal þeirra eru hagfræðingurinn Jeffrey Sachs, forstöðumaður Earth Institute við Columbia-háskólann í Bandaríkjunum, James Speth, prófessor við Yale-háskólann í Bandaríkjunum, Björn Stigson, forseti Alþjóðaviðskiptaráðsins um sjálfbæra þróun (World Business Council for Sustainable Development), dr. R.K. Pachauri, forstjóri tækni- og vísindastofnunarinnar TERI, Lalit Mansingh, fyrrum sendiherra Indlands í Bandaríkjunum, og indversku þingmennirnir Suresh P. Prabhu og Jyotiraditya Scindia.

Bráðnun jökla ógnar

Meðal þeirra verkefna sem þróunarráðið fjallar um er vatnsbúskapur Indverja en bráðnun jökla og íss í Himalayafjöllum ógnar lífskjörum hundraða milljóna Indverja vegna breytinga sem þessi þróun hefur á vatnsmagn í meginfljótum Indlands.

Þróunarráðið, sem á ensku ber heitið India Council for Sustainable Development, mun skila tillögum sem teknar verða til umfjöllunar af indverskum ráðamönnum og stofnunum á ólíkum sviðum þjóðlífsins.