Nafni Jónas þykir Megas gott skáld.
Nafni Jónas þykir Megas gott skáld. — Morgunblaðið/Kristinn
Aðalsmaður vikunnar er ljósmyndari og sölumaður hjá Nýherja. Hann hefur ekki skipulagt hátíðarhöld í tilefni af því að 200 ár eru í dag liðin frá fæðingu alnafna hans.
Lýstu eigin útliti.

Ég er hávaxinn og var grannur, en það er liðin tíð.

Hvaðan ertu?

Reykjavík, nánar tiltekið úr Breiðholtinu.

Ætlar þú að koma norður í leikhús? (Spurt af síðustu aðalskonu, Kristínu Þóru Haraldsdóttur leikkonu)

Stórlega efa ég það, hef reyndar ekki farið í leikhús í nokkur ár.

Hvaða bók lastu síðast?

Justice Denied eftir J.A. Jance.

Á hvaða plötu hlustar þú mest þessa dagana?

Ég hlusta á Blur, „Live at The Budokan“, þegar ég er einn á ferð í bílnum.

Hvað uppgötvaðir þú síðast um sjálfan þig?

Ég held ég segi pass við þessari spurningu.

Hefurðu þóst vera veikur til að sleppa við vinnu eða skóla?

Nei, man ekki til þess. Reyndar freistandi að segja „já, síðast í gær“, til að sjá viðbrögðin hjá yfirmanninum.

Hvernig ætlar þú að halda upp á daginn?

Þetta verður nú bara ósköp venjulegur vinnudagur.

Hvert er uppáhalds ljóðið þitt eftir alnafna þinn?

„Ég bið að heilsa“.

Ertu hagmæltur?

Nei, en get komið niður texta á blað ef þannig ber undir.

Hefur þú fengið þér bjór á Hviids Vinstue?

Nei.

Uppáhaldsleikari?

Siggi Sigurjóns er alltaf góður.

Besta leikrit allra tíma?

Ég held að ég hafi ekki nógu mikið vit á viðfangsefninu til að geta dæmt um hvaða leikrit er best.

Besta íslenska platan sem gerð hefur verið?

Ég hef lúmsk gaman af Megasi, textarnir hans eru hreinasta snilld. Hlusta stundum á „best of“-plötuna, Megas 1972-2002, sem kom út fyrir nokkrum árum. Held að ég velji Loftmyndir sem bestu plötuna, minnir að hún hafi komið út 1987, ári eftir 200 ára afmæli Reykjavíkurborgar.

Hvað hyggstu fyrir á komandi vetri?

Það er nú ekkert sérstakt planað, ætli maður reyni samt ekki að hafa sig í að byrja í líkamsrækt eins og staðið hefur til undanfarna mánuði.

Helstu áhugamál?

Ljósmyndun, ferðalög (langar að ferðast mun meira um landið en ég hef gert, á t.d. Vestfirðina alveg eftir), svo er ég með króníska fótboltadellu (þ.e. að horfa á fótbolta og missi helst aldrei af leik hjá mínum mönnum).

Hvaða kvikmynd eða sjónvarpsefni hefur haft mest áhrif á þig?

Dettur ekkert sérstakt í hug, Forest Gump var reyndar góð saga með fínan boðskap.

Hvers viltu spyrja næsta viðmælanda?

Hvenær ferðaðist þú síðast innanlands og hver fórstu?