1. mars 2008 | Innlendar fréttir | 1043 orð | 1 mynd

„Fólk hætti að vera áralaus bátur, nái í áttavitann og leggi af stað“

Heimasíða Hlutverkaseturs opnuð

Bakhjarlar Ingimundur Sigurpálsson, formaður Samtaka atvinnulífsins, og Grétar Þorsteinsson, forseti ASÍ, opnuðu heimasíðu Hlutverkaseturs.
Bakhjarlar Ingimundur Sigurpálsson, formaður Samtaka atvinnulífsins, og Grétar Þorsteinsson, forseti ASÍ, opnuðu heimasíðu Hlutverkaseturs. — Morgunblaðið/Golli
Eftir Sigrúnu Ásmundsdóttur sia@mbl.is GRÉTAR Þorsteinsson, forseti ASÍ, og Ingimundur Sigurpálsson, formaður Samtaka atvinnulífsins, opnuðu heimasíðu Hlutverkaseturs, hlutverkasetur.is, í gær að viðstöddu fjölmenni.
Eftir Sigrúnu Ásmundsdóttur

sia@mbl.is

GRÉTAR Þorsteinsson, forseti ASÍ, og Ingimundur Sigurpálsson, formaður Samtaka atvinnulífsins, opnuðu heimasíðu Hlutverkaseturs, hlutverkasetur.is, í gær að viðstöddu fjölmenni. Grétar og Ingimundur eru báðir í Bakhjarlahópi Hlutverkaseturs, sem er í nánu samstarfi við Hugarafl, samstarfshóp notenda í bata og iðjuþjálfa. Sérstaða Hlutverkaseturs er að notendaþekking er metin til jafns við fagþekkingu, þannig að þátttakendur í endurhæfingu hafa áhrif á þróun og uppbyggingu fyrirtækisins. Hlutverkasetur er einkafyrirtæki og byggist á þjónustusamningum við opinbera aðila og einkafyrirtæki.

Ragnheiður Kristinsdóttir, iðjuþjálfi á Hlutverkasetri, segir að starfsemin byggist á svokallaðri valdeflingu og að unnið sé á jafningjagrunni. „Markmiðið er að notendur starfi líka að uppbyggingunni. Fyrirtækið sé þannig að reynsla notenda og fagfólks sé lögð saman.“

Í Hlutverkasetri er veittur stuðningur og hvatning auk þess sem einstaklingar innan notendahópsins styðja og hvetja hver annan. „Það að fá tækifæri til að fá tilgang og vakna á morgnana og tilheyra hópi sem er að glíma við svipaða hluti er mjög hvetjandi. Hver og einn fær svo stuðning við að setja sér markmið og finna sinn farveg. Hætta þannig að vera áralaus árabátur, heldur ná í áttavitann og leggja af stað,“ segir Ragnheiður og að markmiðið sé að auka lífsgæðin. Tveir hópar eru í Hlutverkasetri, stór hluti er í launuðum hlutastörfum, en aðrir eru í endurhæfingu. Næsta skref þeirra sem hafa lokið endurhæfingu getur verið starf við hæfi í Hlutverkasetri eða á almennum vinnumarkaði, allt eftir því til hvers hver og einn treystir sér. Notendur Hlutverkaseturs eru fimmtán til tuttugu manns.

Ragnheiður sér fyrir sér að Hlutverkasetur eigi eftir að vaxa og dafna. „Vonandi verður þessi staður stór og með mörgum öngum og mismunandi leiðum fyrir fólk til að byggja upp sitt hlutverk,“ segir hún.

Verkefni Ragnheiðar í Hlutverkasetri segir hún ekki vera að færa fólkinu verkefni á silfurfati. „Mín vinna felst í því að efla og hvetja, að fólkið sjálft finni hvað það vill gera. Það sjálft hafi ábyrgðina. Ég hjálpa til við að finna farveginn, hvar fólkið er sterkt og ég hjálpa fólki að trúa á sjálft sig.“

Ragnheiður leggur áherslu á að allir hafi eitthvað fram að færa. „Þó að fólk hafi skerðingu á einu sviði getur það haft framúrskarandi hæfileika á öðru sviði.“

Vilja opna Kaffi Klikk

Eiríkur Guðmundsson, rekstrarstjóri Hlutverkaseturs, segist vilja sjá útvíkkun á Hlutverkasetri með opnun kaffihúss. „Gamla hugmyndin er opnun Kaffi Klikk,“ segir hann og Auður Axelsdóttir, forstöðumaður geðheilsumiðstöðvar hjá Heilsugæslu höfuðborgarsvæðisins, segir hugmyndina á bak við það vera að þar verði vinnustaður og endurhæfing. „Það yrði líka staður sem almenningur myndi koma inn á, þar sem við getum minnkað fordóma. Á þessu kaffihúsi yrði allt öðruvísi stemning en á öðrum kaffihúsum af því að þarna ynni fólk sem hefur ákveðna þekkingu á því hvað það er að kljást við geðræna erfiðleika, hvernig maður getur mögulega náð bata og hvaða leiðir eru færar á forsendum hvers og eins.“ Eiríkur og Auður segja að á kaffihúsinu yrði þannig ákveðinn þekkingarbanki fyrir fólk sem hugsanlega þarf að leita sér hjálpar. „Þetta gæti orðið fyrsti viðkomustaður einstaklings sem væri að veikjast. Þarna geta samherjar veitt stuðning og leiðbeint viðkomandi um næstu skref,“ segir Eiríkur. Kaffihúsið ætti að vera í samvinnu margra aðila, segja þau. „Stór fyrirtæki sem vilja bera samfélagslega ábyrgð og aðilar vinnumarkaðarins, lífeyrissjóðir... Við viljum bara að einhverjir aðilar komi að þessu og fóstri þetta,“ segir Eiríkur. Ef einhver arður yrði af fyrirtækinu færi það ekki til eigenda heldur í áframhaldandi uppbyggingu.

Það sem vantar núna til að draumurinn um kaffihúsið verði að veruleika er húsnæði og fjármagn og Eiríkur varpaði fram þeirri hugmynd við opnun heimasíðu Hlutverkaseturs að Laugavegur 4-6 væri tilvalinn staður. „Þar væri líka hægt að halda einhverjum minjum í heiðri, það væri bara betra. Þetta gæti þannig haft margfalt gildi.“

Hula aðgerðaleysis og doða hverfur af fólkinu

NANNA Þórisdóttir hefur unnið eitt ár í Hlutverkasetri og er nú orðin verkefnastjóri yfir Notandi spyr notanda-verkefninu, sem felst í því að starfsmenn Hlutverkaseturs gera úttekt á sambýlum á vegum félagsmálaráðuneytis. Nanna veiktist árið 1996 og var „ekkert að gera“, eins og hún orðar það sjálf áður en hún hóf störf í Hlutverkahúsi. „Það er ömurlegt að vera bara heima og gera ekki neitt. Það er mannskemmandi. Þannig að þetta veitir mér ofsalega mikið,“ segir hún. „Það breytist bara allt og snýst við í höfðinu. Maður er ekki fórnarlamb lengur heldur gerandi í lífinu. Fyrst og fremst gagnvart sjálfum sér.“

Nanna segir að hún hafi séð marga hefja störf í Hlutverkasetri og í því ferli tekið eftir miklum breytingum á fólki. „Að vakna á morgnana og þurfa að skila sér í vinnu breytir heilmiklu. Sjálfstraustið hjá fólkinu eflist og það er eins og hula aðgerðaleysis og doða hverfi af því.“

Nanna segir að miklu máli skipti að hún sé að gera þetta á eigin forsendum. Hún er í 25% starfi og líkir sjálfri sér við fyrirtæki á skemmtilega óvæntan hátt. „Ef talað er um hagnað í fyrirtæki er 25% hagnaður í fyrirtæki rosalega mikill. Því þá ekki fyrir manneskjuna líka? Að fara úr engu í 25% er mikið. Svona af því að alltaf er verið að tala um peninga,“ segir hún og brosir út í annað.

„Þetta er bara æði“

Bryndís Edda Eðvarðsdóttir er í endurhæfingu í Hlutverkahúsi, hóf hana í byrjun janúar. Hún hefur verið ár frá vinnu, er menntaður viðskiptafræðingur og starfaði áður sem sérfræðingur á fjármálasviði. Markmið hennar er að ná fyrri færni til að komast aftur út í þjóðfélagið og henni hefur gengið mjög vel. „Bara það að ég get núna allt í einu setið og unnið á tölvu, ég gat það ekki áður. Við erum með tölvukennslu hérna og ég finn orkuna og einbeitinguna,“ segir hún. Bryndís Ebba segir „æðislegt“ að koma reglulega í Hlutverkasetur. „Af því að ef ég kæmi ekki hingað væri ég bara heima í þunglyndi. Ég var ekki tilbúin að fara að vinna. Að koma hingað og hafa þessa aðstöðu! Þetta er bara æði, sko.“

Í hnotskurn
» Hlutverkasetur hefur í samvinnu við félags- og tryggingamálaráðuneytið starfrækt verkefnið Notandi spyr notanda, NsN. Starfsmenn með notendareynslu gera gæðaúttekt á sambýlum á vegum svæðisskrifstofu um málefni fatlaðra í Reykjavík.
» Fræðsludagar hafa verið haldnir á landsbyggðinni fyrir fagfólk, notendur o.fl.
» Fræðsluhópur er starfandi í samvinnu við Hugarafl, með það að markmiði að fræða ungmenni um mismunandi leiðir til eflingar geðheilsu.

Aðgangsupplýsingar

Notandi:Þú ert ekki innskráð(ur).
Greinin: Þessi grein er ókeypis þar sem hún er eldri en þriggja ára.
Morgunblaðið - fyrsta forsíðan

Morgunblaðið hjá Landsbókasafni

Á vefnum timarit.is er að finna stafrænt safn Landsbókasafns yfir helstu dagblöð og tímarit landsins. Þetta er eina leiðin til að leita að efni úr Morgunblaðinu frá því fyrir 1986.