Kraftalegur Toyota Double Hilux Cap er kraftalegur í útliti og stílhreinn
Kraftalegur Toyota Double Hilux Cap er kraftalegur í útliti og stílhreinn
[ Smellið til að sjá stærri mynd ]
Toyota Hilux pallbíll hefur verið meðal vinsælustu vinnubíla allt síðan hann kom fyrst fram í sviðsljósið árið 1967. Sjötta kynslóðin af Toyota Hilux kom á markað fyrir um ári síðan. Róbert Róbertsson reynsluók Hilux Double Cap.
Bíllinn, sem reynsluekið var, var Hilux Double Cap með þriggja lítra túrbó-dísilvél. Hún skilar 171 hestafli sem gerir bílinn nokkuð kraftmikinn. Þetta er mikil framför miðað við eldri týpuna sem var oft dálítill sleði. Bíllinn hefur breyst talsvert frá fyrirrennararnum, hann er orðinn stærri og aflmeiri en er samt sem áður í aðalatriðum sami látlausi og sterkbyggði vinnubíllinn.

Togið er mjög gott eða 343 Nm við 2000 snúninga á mínútu sem er talsvert meira tog en 2,5 lítra dísilvélin sem hefur einnig verið í boði í Hilux. Aukið vélarafl og snerpa gera bílinn liprari og snarpari en búast hefði mátt við. Hann kom því nokkuð skemmtilega á óvart með þessari nýlegu þriggja lítra túrbóvél og fjögra þrepa sjálfskiptingu.

Hilux er með svokallað hlutadrif, þ.e. honum er ekið að jafnaði í afturhjóladrifi. Fjórhjóladrifið er valið með því að ýta á takka og tengibúnaður framhjóla er sjálfvirkur. Tannstangardrifið í stýrinu er tengt beint, sem eykur stýrisviðbragð og kemur sérstaklega vel út í borgarakstri.

Notadrjúgur bíll

Bíllinn var prófaður á holóttum malarslóða og þar sýndi hann svo ekki verður um villst góða torfæru-eiginleika. Í fjórhjóladrifinu getur Hilux nokkuð auðveldlega ekið upp allt að 30 gráðu brattar brekkur. Undirvagninn er hár þannig að hann komst léttilega yfir allháar ójöfnur. Veggrip og stöðugleiki var til fyrirmyndar. Þetta er sannkallaður vinnuþjarkur og því kemur ekki á óvart að bíllinn er mjög vinsæll meðal verktaka og bænda. Ekki er neinn skortur á hleðslurými því pallurinn á Hilux Double Cap er 1520 mm á lengd og hámarksburðargeta er alls 930 kíló.

Sé Hilux hins vegar breytt með því að setja á hann hús að aftan er þar kominn eins og nýr bíll. Ekki bara í útliti og notagildi heldur breytast akstureiginleikarnir þó nokkuð. Bíllinn verður mýkri í akstri, sérstaklega að aftan þegar 100 kílóa húsið er komið aftan á.

Mismunadrif við erfiðar aðstæður

Allur öryggisbúnaður Hilux er til fyrirmyndar eins og búast mátti við af Toyota. Vert er að nefna mismunadrifið í Hilux (Limitied Slip Differential), sem aðstoðar við akstur á hálu yfirborði. Búnaðurinn virkar þegar hjól missir grip og veitir auknu snúningsátaki til þeirra hjóla sem hafa meira grip. Þetta dreifða snúningsvægi á milli vinstri og hægri hjólanna eykur stöðugleikann í beygjum og við erfiðar aðstæður. LSPV kerfið (Load Sensing Proportioning Valve) hámarkar hemlun í beinu samræmi við farmþunga Hilux og eykur hemlunarþrýsting að aftan þegar bíllinn er hlaðinn. Þá má einnig nefna ADD-búnaðinn (Automatic Disconnecting Differential), sem sér um að aftengja sjálfkrafa framhjólin þegar skipt er úr fjórhjóladrifi í tveggja hjóla drif á fullri ferð. Sú aðgerð bætir einnig eldsneytisnýtinguna.

Stærri og rúmbetri að innan

Í útliti er Hilux Double Cap kraftalegur að sjá en myndi seint teljast beint laglegur. Útlínurnar eru samt nokkuð rennilegar og túrbínuopið á húddinu gefur honum dálítið töffaralegt yfirbragð. Bíllinn hefur stækkað talsvert að innan. Plássið er gott í alla staði fyrir ökumann og farþega. Hilux Double Cap rúmar fimm manns Mælaborðið er frekar einfalt og látlaust sem og miðstokkurinn og allar aðgerðir því auðveldar. Sætin eru ágætlega þægileg og þar hefur einnig orðið breyting til batnaðar frá fyrirrennaranum. Það er kannski skemmtilegt að segja frá því að verktaka nokkrum fannst nýja hönnunin að innan vera orðin einum of fín og snyrtileg fyrir vinnubíl. Hann var farinn að strjúka mesta skítinn úr fötunum áður en hann settist upp í bílinn.

Hilux Double Cap sjálfskiptur kostar 4.120.000 kr. Hægt er að fá bílinn beinskiptan og er hann þá 250.000 kr. ódýrari.

Toyota Hilux Double Cap

Vél: 3 lítra, 4 strokka dísilvél.

Aflgeta: 171 hestafl, 343 Nm við 2000 sn./mín.

Drif: Fjórhjóladrif.

Hámarkshraði: 170 km/klst. (beinsk.) – 175 km/klst. (sjálfsk.)

Gírskipting: 5 gíra handskipting, 4 þrepa sjálfskipting.

Lengd: 5255 mm.

Breidd: 1760 mm.

Hæð: 1695-1810 mm.

Hjólhaf: 3085 mm.

Eigin þyngd: 1840-1890 tómur

Farangursrými: 930 kg. farmþungi á palli

Hemlar: Loftkældir diskar að framan, skálar að aftan

Hjólbarðar: 255/70R15

Felgur: 15 tommu álfelgur

Eyðsla: 8,3 lítrar (beinsk.) – 9,4 lítrar (sjálfsk.) í blönduðum akstri

Verð: 3.870.000 (beinsk.) – 4.120.000 (sjálfsk.)

Umboð: Toyota á Íslandi.