Kartöflur Guðbjörg Ósk Sveinsdóttir og Svanur Berg Jóhannsson afhentu Einari K. Guðfinnssyni bæklinginn. Til hægri er Sigríður Bergvinsdóttir.
Kartöflur Guðbjörg Ósk Sveinsdóttir og Svanur Berg Jóhannsson afhentu Einari K. Guðfinnssyni bæklinginn. Til hægri er Sigríður Bergvinsdóttir. — Ljósmynd/Kristján
ÞAÐ má segja að með þessum uppskriftum viljum við kippa kartöflunni inn í 21. öldina.
ÞAÐ má segja að með þessum uppskriftum viljum við kippa kartöflunni inn í 21. öldina. Það kunna allir að sjóða og baka, en færri hafa kynnst kartöflubrauði og súkkulaðikökum sem gerðar eru úr kartöflum,“ segir Bergvin Jóhannsson, formaður Landssambands kartöflubænda, í tilefni af því að sambandið hefur gefið út uppskriftabækling í tilefni af ári kartöflunnar.

Einar K. Guðfinnsson, sjávarútvegs- og landbúnaðarráðherra, var á meðal gesta á veitingastaðnum Friðriki V á Akureyri í fyrrakvöld þegar sem bæklingurinn var kynntur og gestum boðið að smakka á tíu kartöfluréttum sem finna má uppskriftir af í bæklingnum. Var Einari afhent fyrsta eintak bæklingsins.

Bæklingurinn mun liggja frammi í matvöruverslunum án endurgjalds fyrir þá sem vilja kynnast nýjum hliðum á kartöflunni.

„Kartaflan á sér tryggan sess í eldhúsum landsmanna enda eru rétt 250 ár síðan kartöflurækt hófst hér á landi,“ segir Sigríður Bergvinsdóttir sem sér um útgáfu bæklingsins og hefur staðið í ströngu við að búa til uppskriftir og elda kartöflurétti fyrir verkefnið. „Við finnum þó að neytendur vilja prófa eitthvað nýtt og þess vegna erum við að gefa út nýstárlegan bækling með nýjum uppskriftum og fróðleik. Nokkrir einstaklingar leggja okkur lið með skemmtilegum frásögnum sem tengjast kartöflunni og það er öruggt að flestir ættu að finna sinn uppáhaldskartöflurétt í bæklingnum,“ segir Sigríður ennfremur.