Tvær fjölskyldur í Flatey allt árið "Sjaldgæft að finna til einsemdar" VETRARLEGT er nú um að litast í Flatey á Breiðafirði. Þar búa tvær fjölskyldur allt árið, eða 6­7 manns.

Tvær fjölskyldur í Flatey allt árið "Sjaldgæft að finna til einsemdar"

VETRARLEGT er nú um að litast í Flatey á Breiðafirði. Þar búa tvær fjölskyldur allt árið, eða 6­7 manns. Aðeins eru tvö börn í Flatey, Íris og Rán Magnúsardætur, dætur Hrannar Hafsteinsdóttur Guðmundssonar sem er annar ábúanda í Flatey ásamt fjölskyldu sinni. Aðspurður um hvort stelpurnar finni ekki til einsemdar út í Flatey yfir vetrarmánuðina, segir Hafsteinn það sjaldgæft að þær og aðrir finni sér ekki eitthvað til dægradvalar. "Einmanaleikinn er svo afstæður eins og annað og fer líka eftir því hverju menn venjast. Þær hafa verið hérna síðan þær voru smábörn og eru ekki búnar að kynnast þessum svonefnda einmanaleika. Hér er sjónvarpið notað töluvert mikið og það er spilað, teflt og lesið og úti við nota stelpurnar óspart snjóinn til að renna sér á þotum eða byggja kerlingar," segir Hafsteinn.

Hann hefur búið í Flatey frá því árið 1965 og kveðst stunda landbúnað í gömlum stíl, þar af sauðfjárrækt í litlum mæli, og nýtingu þeirra hlunninda sem fylgt hafa bújörðum þar frá örófi alda. Meðal hlunninda má nefna fuglatekju, dúntekju og grásleppuveiði, en síðarnefndu tekjustofnarnir hafa brugðist á seinustu misserum, annars vegar vegna veðráttu og hins vegar vegna mikillar sjósóknar á sama tíma og lítið var um grásleppu. Hafsteinn hefur því í hyggju að hefja móttöku og þjónustu við ferðamenn þegar vorar til að fjölga tekjulindum.

23 hús í Flatey

Hafsteinn er úr Skáleyjum og flutti til Flateyjar þegar reynt var að styrkja byggð í Breiðafirði um miðjan 7. áratuginn, og leitað var m.a. til hans. Í Flatey eru um 23 hús, þar af allmörg frá seinni hluta síðustu aldar, og eru þau nær öll lokuð yfir vetrartímann, og segir Hafsteinn afar fátítt að skemmdir verði á eigum vegna veðurs þó að fyrir komi að tjón verði þegar lausamunir fjúka á hús. Flóabáturinn Baldur hefur þar viðkomu þrisvar í viku um vetrartímann og færir hann eyjarskeggjum aðföng og vistir, en íbúar pantar vörur í gegnum síma frá Stykkishólmi.

Morgunblaðið/Jón P. Ásgeirsson

Flatey í vetrarbúningi

HORFT yfir byggð í Flatey en þau hús sem búið er í yfir vetrartímann eru kynt með olíu enda engin hitaveita þar. Á myndinni til hægri eru einu börnin í Flatey, þær systur Íris og Rán.