24. nóvember 2008 | Innlendar fréttir | 876 orð | 5 myndir

Reyndu að frelsa mann úr varðhaldi

*500 manns mótmæltu handtöku á aðgerðasinna fyrir utan lögreglustöðina við Hverfisgötu *Lauk með brotnum rúðum, húsbroti, piparúða og stimpingum *Mannleg mistök voru undanfari

— Morgunblaðið/Júlíus
[ Smellið til að sjá stærri mynd ]
Eftir Önund Pál Ragnarsson onundur@mbl.is MISTÖK hjá innheimtumiðstöð sekta og sakarkostnaðar og óvarleg vinnubrögð lögreglu voru undanfari þess að gert var áhlaup á lögreglustöðina á Hverfisgötu á laugardag.
Eftir Önund Pál Ragnarsson

onundur@mbl.is

MISTÖK hjá innheimtumiðstöð sekta og sakarkostnaðar og óvarleg vinnubrögð lögreglu voru undanfari þess að gert var áhlaup á lögreglustöðina á Hverfisgötu á laugardag. Annars vegar fékk Haukur Hilmarsson aðgerðasinni enga boðun í afplánun, vegna mannlegra mistaka hjá innheimtumiðstöðinni. Það kom fram í fréttatilkynningu þaðan í gær. Boðun á að senda skv. 71. gr. laga um fullnustu refsinga. Hún var ekki send.

Það skýrir að hluta til hörð viðbrögð aðstandenda Hauks. Þeim sýndist ákvörðun lögreglu vera geðþóttaákvörðun.

Verulega illa tímasett handtaka

Í öðru lagi tók lögregla ekki mið af stemningu í samfélaginu, þegar hún handtók þekktan mótmælanda daginn fyrir skipulögð mótmæli. Sú ákvörðun hefur vakið hörð viðbrögð og margir sagt hana hafa annarlegan tilgang. Hörður Torfason mótmælandi segist m.a. setja stórt spurningarmerki við þessa handtöku.

Stefán Eiríksson, lögreglustjóri á höfuðborgarsvæðinu, neitar því ekki að handtakan hafi verið illa tímasett. „Ég get alveg tekið undir að þetta hefði mátt vera með öðrum hætti. Hins vegar var þessi maður ekki undir neinu sérstöku eftirliti hjá okkur. Þess vegna fór bara með hann eins og alla aðra sem eru eftirlýstir. Þetta fór ekki í neina sérmeðferð upp á mitt borð eða annarra embættismanna,“ segir Stefán. Hann segir fráleitt að handtakan hafi verið gerð til að kæfa niður mótmæli.

Hefði ekki þurft að gerast

Um fimm hundruð manns fóru að lögreglustöðinni eftir fundinn á Austurvelli og kröfðust þess að Haukur yrði látinn laus. Eftir um klukkustundarlöng mótmæli magnaðist reiðin svo tekið var til við að grýta húsið og brjóta upp útidyrnar. Þrjár rúður brotnuðu og komst fólkið að innri hurð anddyrisins. Þar tóku 15-20 lögreglumenn á móti, klæddir hlífðarbúnaði fyrir óeirðir. Þeir sprautuðu piparúða yfir hópinn, ruddu anddyrið og stóðu svo vörð fyrir utan. Nokkrir leituðu sér læknishjálpar í framhaldinu, vegna piparúðans. Á sama tíma greiddi ónefndur aðili sekt Hauks, sem var tilefni fangelsisvistarinnar, svo honum var sleppt út.

Hörður Torfason, skipuleggjandi útifundanna á Austurvelli, fordæmir allt ofbeldi. Hins vegar segir hann að þetta hefði ekki þurft að gerast. Lögregla hafi í engu svarað mótmælendum og enginn komið út til að skýra málin.

Eva Hauksdóttir, móðir Hauks, sem leiddi mótmælin, segir engan einn hafa hvatt til húsbrotsins. Smátt og smátt hafi æsingurinn magnast upp. Hún hafi ekki átt frumkvæðið að því, en ef reiði fólks í þessu samfélagi sé hunsuð grípi það einfaldlega til ráða af þessu tagi.

Mótmælin fylltu Austurvöll í fyrsta sinn

Eftir Önund Pál Ragnarsson

onundur@mbl.is

ENN fjölgar í vikulegum mótmælum á Austurvelli. Fyrir viku voru þar um 6.000 manns en núna á laugardaginn voru þar ívið fleiri, líklega upp undir 7.000. Austurvöllur fylltist af fólki og þurfti Hörður Torfason, listamaður og skipuleggjandi mótmælanna, að biðja fólk að færa sig nær og þjappa svo fleiri kæmust inn á völlinn.

„Ég er búinn að vera þarna á laugardögum í sjö vikur. Frá því við vorum þarna fjögur eða fimm hefur orðið gríðarleg breyting,“ segir Hörður.

Kannski þarf stærri vettvang

Hann metur núna eftir hvern fund hvort Austurvöllur dugi enn til sem fundarstaður. Hann útilokar ekki að fundurinn verði fluttur á aðra staðsetningu þegar fram í sækir ef fólki fjölgar enn. Næsti fundur hefur samt verið boðaður á sama stað.

Fólk bryddaði upp á ýmsu. Styttan af Jóni Sigurðssyni var klædd í femínísk-bleikan upphlut og skotthúfu, sem táknmynd fyrir slakan árangur af forystu karla á undanförnum árum. Alþingishúsið var auglýst sem „til sölu“ og „selt“ Alþjóðagjaldeyrissjóðnum. Engir árekstrar urðu meðal fólks og samskipti við lögreglu voru góð.

Auk þessa voru fluttar ræður þar sem nokkrar manneskjur kynntu sinn skilning á kreppunni.

Réttlæti, ekki hefnd

Sindri Viðarsson sagnfræðinemi sagði að dagar fáfræði og sandkassaleikja í stjórnmálum væru taldir. Sindri sagðist vilja betra samfélag, byggt á jöfnuði. „Við ætlum að byggja betra samfélag og þeim skilaboðum þurfum við að bera áleiðs, þeim sem heima sitja og bera þrælslund í hjarta gagnvart stjórnvöldum.“ „Höfum réttlæti í huga en ekki hefnd. Höfum náungakærleik í hjartastað og kaupum það síðasta sem keypt verður í langan tíma; betra samfélag sem byggist á jöfnuði en ekki spillingu, það byggist á jöfnum auði en ekki flokksskírteinum, það byggist á samhjálp liðinna alda.“

Gerður Pálma atvinnurekandi sagði Ísland nú í heimspressunni sem aldrei fyrr og ekki af góðu, en sú ímynd sem listafólk hefði skapað gegnum árin væri enn sterkari í hugum heimsins.

Á botninn hvolft

Katrín Oddsdóttir laganemi sagði í ræðu að þjóðin hefði verið svipt réttinum til að fara með mál sitt fyrir dómstóla, þjóðin hefði ekki fengið og myndi aldrei fá tækifæri til að láta reyna á sínar hliðar. Hún sagði Geir Haarde ekki hafa viljað láta kúga sig, en hins vegar vera opinn fyrir því að láta kúga íslensku þjóðina.

Hún rifjaði líka upp kjörorð Sjálfstæðisflokksins fyrir síðustu kosningar. „Þegar öllu er á botninn hvolft er það traust efnahagsstjórn sem er stærsta velferðarmálið. Nú hefur öllu verið á botninn hvolft. Okkur öllum hefur verið hvolft á botninn og stærsta velferðarmálið í augnablikinu er að koma þeim frá, sem klúðruðu efnahagsstjórninni og hafa hvorki sýnt iðrun né vilja til að endurskoða þau gildi sem þeir höfðu að leiðarljósi,“ sagði Katrín.

Í hnotskurn
» Haukur Hilmarsson var skráður eftirlýstur af hálfu innheimtumiðstöðvarinnar á Blönduósi hinn 11. nóvember sl.
» Þriggja vikna fyrirvari á afplánun á ekki við um sektardóma. Skv. lögum er þó skylt að senda hinum dæmda tilkynningu. Það fórst fyrir.

Aðgangsupplýsingar

Notandi:Þú ert ekki innskráð(ur).
Greinin: Þessi grein er ókeypis þar sem hún er eldri en þriggja ára.
Morgunblaðið - fyrsta forsíðan

Morgunblaðið hjá Landsbókasafni

Á vefnum timarit.is er að finna stafrænt safn Landsbókasafns yfir helstu dagblöð og tímarit landsins. Þetta er eina leiðin til að leita að efni úr Morgunblaðinu frá því fyrir 1986.