Kosningar 2009

Árni Páll sækist eftir endurkjöri

ÁRNI Páll Árnason þingmaður sækist eftir að leiða lista Samfylkingar í Suðvesturkjördæmi í komandi kosningum. Árni hefur m.a. menntun í Evrópurétti og hefur kennt við HR frá 2004. Hann hefur m.a. setið í heilbrigðisnefnd, utanríkismálanefnd og viðskiptanefnd Alþingis og er nú formaður allsherjarnefndar.

Una María býður sig fram í 2. sætið

UNA María Óskarsdóttir, formaður Freyju, félags framsóknarkvenna í Kópavogi, býður sig fram í 2. sæti á lista Framsóknarflokksins í Suðvesturkjördæmi.

Una María er uppeldis- og menntunarfræðingur með BA-próf frá Háskóla Íslands og stundar nú meistaranám í lýðheilsuvísindum við sama skóla.

Friðrik gefur kost á sér í 4. sæti VG

FRIÐRIK Atlason forstöðumaður á sambýli gefur kost á sér í 4. sæti í forvali VG í Reykjavík. Friðrik hefur lengi starfað að málefnum fatlaðra. Hann situr í Borgarmálaráði VGR og í stjórn SFR – Stéttarfélags í almannaþjónustu. Hann hefur m.a. unnið að verkefnum fyrir Femínistafélag Íslands.

Ingigerður fram í Suðurkjördæmi

INGIGERÐUR Sæmundsdóttir gefur kost á sér í prófkjör sjálfstæðismanna í Suðurkjördæmi. Hún er verkefnastjóri Félags foreldra og foreldraráða í grunnskólum Reykjanesbæjar og nemi í HÍ. Hún er ritari Sjálfstæðisfélagsins Njarðvíkings síðan 2007.

Bryndís sækist eftir 2. sætinu

BRYNDÍS Bjarnarson býður sig fram í 2. sæti á lista Framsóknarflokksins í Suðvesturkjördæmi.

Hún sat m.a. í bæjarstjórn Mosfellsbæjar 2002-2006, er með BA gráðu í hagfræði, heimspeki og stjórnmálafræði frá Háskólanum á Bifröst og er nú í meistaranámi í menningarstjórnun.