Almost Famous Elton John bjargar hljómsveitarmóralnum.
Almost Famous Elton John bjargar hljómsveitarmóralnum.
[ Smellið til að sjá stærri mynd ]
Eftir Birgi Örn Steinarsson biggi@mbl.is Þegar kemur að kvikmyndum á orðatiltækið „tónlist er tilfinning í hljóði“ einstaklega vel við.

Eftir Birgi Örn Steinarsson

biggi@mbl.is

Þegar kemur að kvikmyndum á orðatiltækið „tónlist er tilfinning í hljóði“ einstaklega vel við. Fyrir hundrað árum var leikið á píanó undir þöglum kvikmyndum til þess að kæfa annars æpandi þögn hvíta tjaldsins. Þegar kvikmyndagerðarmenn hitta naglann á höfuðið hvað tónlistarval varðar við lykilsenur getur það haft slík áhrif á áhorfandann að hár rísa á höndum og tárin leka niður vanga þeirra.

Stundum styðjast leikstjórar við tónlist poppara eða rokkara sem smellpassa svo vel að senurnar verða ógleymanlegar og lögin öðlast jafnvel annað líf. Rifjum upp nokkrar slíkar.

Apocalypse Now / The Doors – The End.

Leikstjórinn Francis Ford Coppola gefur tóninn á vonleysislega sýn sína á Víetnam-stríðið strax í opnunaratriði myndarinnar þar sem þyrlur fljúga yfir þykkan skóg sem brennur hægt til kaldra kola við heimsendaóð rokksveitarinnar The Doors. Hippasveitin hefði líklegast aldrei samþykkt lagið í myndina ef ekki hefði verið um stríðsádeilu að ræða.

Pulp Fiction / Urge Overkill – Girl, You'll be a Woman Soon

Þessi afar kynörvandi útgáfa af smelli Neils Daimonds smellpassar til þess að fanga spennuna er ríkir á milli Miu Wallace (Umu Thurman) og Vincents Vega (Johns Travolta) eftir að þau koma heim af veitingastaðnum Jack Rabbit Slim. Á meðan Vincent reynir að tala losta sinn niður á klósettinu stelst Mía í heróínið hans sem hún taldi ranglega kókaín. Lagið fjarar svo út um leið og Mía missir meðvitund með blóð seytlandi niður nasirnar.

Fight Club / Pixies – Where is my Mind?

Atriðið sem kynnti Pixies fyrir nýrri kynslóð rokkunnenda. Persóna Edwards Nortons (sem aldrei er nefnd með nafni í myndinni) er fyllt blöndu af hryllingi og aðdáun þegar hann fylgist með hryðjuverki níhílistans Tylers Durdens (Brad Pitt). Áhorfandinn fyllist einkennilegu æðruleysi á meðan skýjakljúfar sem hýsa höfuðstöðvar helstu greiðslukortafyrirtækja heims falla einn af öðrum.

Magnolia / Aimee Mann – Wise Up

Á viðkvæmum tímapunkti í þessari mögnuðu mynd þegar allar persónur virðast ná botni sínum gerist hið ótrúlega. Í eymd sinni raula þær allar með þessum tilfinningaþrunga óði sem fjallar um að gefast upp fyrir eigin sjálfi. Meira að segja sjálfur Tom Cruise syngur og það virkar.

Almost Famous / Elton John – Tiny Dancer

Hljómsveitin Stillwater sækir gítarleikarann Russell Hammond (Billy Crudup) í partí eldsnemma um morguninn. Hljómsveitarmórallinn er í botni eftir heljarinnar rifrildi kvöldið áður. Russell er leiddur inn í rútuna á bömmer og sveitin heldur tónleikaferðalagi sínu áfram. Þegar þessi gullni slagari Eltons Johns ómar í rútunni er hann eins og plástur á sárin.

Wayne's World / Queen – Bohemian Rhapsody

Þetta frábæra byrjunaratriði á fyrri Wayne´s World-myndinni gefur tóninn í þessari frábæru gamanmynd. Wayne (Mike Mayers) eru í bílnum að syngja með í fíling. Létt grín sem gerir þó, ótrúlegt en satt, ekki lítið úr laginu sjálfu.

Donnie Darko / Gary Jules – Mad World

Það er lítið um orð síðustu fjórar mínúturnar í vísindaskáldsögunni Donnie Darko. Enda algjör óþarfi, þessi ábreiðsla Garys Jules á gamla Tears for Fears-laginu segir allt sem segja þarf.

O Brother, Where Art Thou / Oh Death – Ralph Stanley

Óborganleg sena þar sem strokufangarnir Everett (George Clooney), Pete (John Turturro) og Delmar (Tim Blake Nelson) rata óvart inn á útiþing Klux Klux Klan. Atriðið er listavel sett upp og er spaugilegur óður til nasistamynda Lene Riefenstahl.

Romeo + Juliet / Des'ree – Kissing You

Leikstjórinn Baz Luhrman ber einstakt skynbragð á að blanda saman popptónlist við kvikmyndun. Það sannar þessi listfengna og rómantíska sena þegar augu dæmdu elskhuganna Rómeós (Leonardo DiCaprio) og Júlíu (Clare Daines) mætast fyrst í gegnum fiskabúr á salernum skemmtistaðar.

Easy Rider / The Band – The Weight

Ekkert spes að gerast í myndinni. Wyatt (Peter Fonda) og Billy (Dennis Hopper) keyra á mótorhjólum sínum í gegnum Arizona og tónlist The Band smellpassar.