Albert Ólafsson

Nú er fallinn frá öðlingsmaðurinn Albert Ólafsson, hann Addi í Blokkinni, maðurinn hennar Rögnu föðursystur. Addi var einstakur maður, jákvæður og ávallt skapgóður. Hann var traustur vinur og stóð með sínum.

Faðir okkar hefði ekki getað hugsað sér betri mág enda voru þeir alla tíð miklir mátar. Fjölskyldurnar áttu mikið samneyti. Minnistæð eru öll áramótin sem við áttum hjá Adda og Rögnu í Blokkinni. Þá var farið upp á þak og horft yfir borgina um leið og kveikt var í flugeldunum okkar með áramótavindlinum, en Addi hafði þann sið að púa vindil um áramót. Þegar nýja árið gekk í garð ræddu þeir félagar heimsins gagn og nauðsynjar í þaula enda báðir með sterkar skoðanir sem einatt fóru saman. Oft þóttust þeir þó vera á öndverðum meiði, sér til skemmtunar.

Heimili Adda og Rögnu í Sólheimum 25 var notalegt heim að sækja. Það var oft glatt á hjalla í Blokkinni, uppátækjum okkar ávallt vel tekið og alltaf tími til að gera hlé á þjóðfélagsumræðum til að sjá stutt frumsamin leikrit eða loftfimleika. Þar var aðeins ein krafa, það mátti enginn vera með læti í eftimiðdaginn, þá var Addi að leggja sig, því hann fór svo snemma til vinnu.

Addi var hæglátur en hafði engu að síður sterkar skoðanir. Pólitíkin var honum alltaf hugleikin og hann hafði óbilandi trú á lýðræði, jafnrétti og bræðralagi. Hann var sósíalisti, atvinnuveitandi og traustur í baráttu fyrir bættum hag alþýðunnar. Addi var líka baráttumaður fyrir hag einyrkja gagnvart ægivaldi verksmiðju fjöldaframleiðslu sem nánast þurrkaði út sjálfstæð bakarí á Íslandi.

Margir eiga eftir að sakna Adda í AB bakaríinu á Dalbraut enda vinsæll viðkomustaður margra, fólks á öllum aldri og úr öllum stigum þjóðfélagsins. Bakaríð var alvöru fjölskyldufyrirtæki og félagsmiðstöð þar sem allir voru velkomnir. Addi var alltaf mættur til vinnu fyrir klukkan fimm á morgnana og margir lögðu það í vana sinn að kíkja inn og fá kaffibolla í morgunsárið. Þar urðu oft ákafar umræður sem Addi tók virkan þátt í án þess að fallast nokkru sinni hönd úr verki. Bolludagurinn var alltaf sérstakur og þann dag var alltaf allt fullt, enda bollurnar víðfrægar og allir leystir vel út. Seyddu rúgbrauðin báru hróður bakarísins víða.

Þau voru ófá skólabörnin úr hverfinu sem komu við á leiðinni úr sundi til að kaupa sér snúð enda vel útilagðir, gómsætir með helling af glassúr. Við krakkarnir, systkinabörn Rögnu, nutum tengslanna til fullnustu.

Frá því að Addi dró sig í hlé frá bakstrinum hafa margir reynt að falast eftir leyndarmálinu, snúðauppskriftinni, en hún bíður þess að einhverjir úr fjölskyldunni taki við keflinu.

Á seinni árin eftir að við komust til vits og ára var alltaf notalegt að setjast með Adda og ræða brennandi málefni, stefnu og stöðu í stjórnmálunum líðandi stundar. Adda er sárlega saknað úr hornstólnum í Sólheimunum. Við minnumst Adda í Blokkinni með virðingu og þakklæti fyrir samverustundirnar og vottum Rögnu og fjölskyldu innilegar samúðarkveðjur.

Ásta, Einar, Kristín og Björk Þorleifsbörn.

Nú er Addi farinn og þið eigið öll um sárt að binda

Addi bakari eins og við kölluðum hann alltaf hefur lokið lífsgöngu sinni hér á þessari jörð. Við munum öll sakna hans en munum eftir honum sem sérstaklega hlýlegum og skemmtilegum manni. Hláturmildur og glaður og hvers manns hugljúfi. Mér þykir sárt að hafa ekki haft tækifæri til að hitta ykkur oftar eftir að við Maggi fluttum vestur.

Elsku Ragna mín! Ég og Magnús sendum þér og fjölskyldu þinni hugheilar kveðjur og vottum ykkur innilega samúð ykkar.

Valborg Soffía og Magnús.