ÞAÐ eru margar leiðir til að styðja Hjálparstarf kirkjunnar fyrir jólin og ein þeirra er að skila inn gömlum og notuðum farsímum.

ÞAÐ eru margar leiðir til að styðja Hjálparstarf kirkjunnar fyrir jólin og ein þeirra er að skila inn gömlum og notuðum farsímum. Græn framtíð og Síminn hvetja fólk til að koma með gamla GSM síma í verslanir Símans, en þeir verða svo sendir í endurnýtingu og mun andvirðið renna til innanlandsaðstoðar Hjálparstarfs kirkjunnar. Þeir sem eiga ónotaða síma geta þannig stutt gott málefni og um leið lagt sitt á vogarskálarnar í umhverfisvitund. Afrakstur söfnuninnar verður afhentur Hjálparstarfi kirkjunnar í byrjun janúar.

Að sögn Bjarna Gíslasonar, fræðslu- og upplýsingafulltrúa Hjálparstarfs kirkjunnar hefur þörfin fyrir aðstoð vaxið gríðarlega á þessu ári. „Rúmlega helmingi fleiri leituðu til Hjálparstarfs kirkjunnar í október 2009 miðað við sama mánuð í fyrra, eða 319 í október í fyrra en 886 í sama mánuði í ár. Að baki hverjum umsækjanda voru 2,7 einstaklingar að meðaltali sem þýðir að 2.300 einstaklingar nutu aðstoðar í októbermánuði í ár,“ segir Bjarni.