FH-ingar fagna Fótboltastrákar láta veðrið ekki skipta máli þegar kemur að því að fagna innilega, en hlýindin spilla eflaust ekki fyrir. Mótið er umfangsmikið því alls eru 168 lið skráð til leiks.
FH-ingar fagna Fótboltastrákar láta veðrið ekki skipta máli þegar kemur að því að fagna innilega, en hlýindin spilla eflaust ekki fyrir. Mótið er umfangsmikið því alls eru 168 lið skráð til leiks. — Morgunblaðið/Skapti Hallgrímsson
[ Smellið til að sjá stærri mynd ]
Una Sighvatsdóttir una@mbl.is Sumarið hefur farið hægt af stað á Norðurlandi eystra og íbúar þurft að sitja af sér hryssingslegan júnímánuð þar sem hitinn skreið sjaldnast upp í tveggja stafa tölu.
Una Sighvatsdóttir

una@mbl.is

Sumarið hefur farið hægt af stað á Norðurlandi eystra og íbúar þurft að sitja af sér hryssingslegan júnímánuð þar sem hitinn skreið sjaldnast upp í tveggja stafa tölu.

Júlímánuður virðist ætla að verða Norðlendingum blíðari og nú ber svo við að Norðausturland er sá landshluti sem kemur best út í veðurspá helgarinnar. Í ofanálag er sérlega mikið um að vera á þeim slóðum um helgina og því óhætt að mæla með því að ferðalangar sem vilja elta sólina og menningarlífið á landsbyggðinni taki stefnuna norður. Sólin mun að vísu aðeins brosa við Norðlendingum á milli léttra skýja en útlit er fyrir blíðskaparveður með sæmilegum hlýindum, allt að 15° hita, suðaustan 5 m/sek og engri úrkomu. Hlýjast verður í innsveitum norðanlands. Á sama tíma má búast við rigningu og hvassviðri á Suðurlandi og alskýjuðum himni víðast hvar annars staðar á landinu.

Brosa hringinn í hækkandi hita

„Það er þvílík gleði að sjá hitastigið fara hækkandi með hverjum degi. Við sjáum fram á indælisveður um helgina,“ segir Hlynur Birgisson í Pollamótsnefnd Íþróttafélagsins Þórs á Akureyri. Pollamót Þórs, sem í reynd er ætlað „lávörðum“, „öðlingum“ og öðrum sem komnir eru af pollaaldri, hefst á föstudagsmorgun.

Í gær hófst hinsvegar N1-mót KA, fyrir drengi í 5. flokki. Óskar Þór Halldórsson framkvæmdastjóri knattspyrnudeildar KA fagnar einnig góða veðrinu. „Þetta byrjar mjög vel, helsti andstæðingur okkar í þessu er rignin en það hætti að dropa í dag og spáin er bara góð aldrei þessu vant. Ég get ekki annað sagt en að ég brosi hringinn yfir því, við áttum það orðið alveg inni finnst mér,“ segir Óskar Þór.

Knattspyrnan verður því áberandi norðan heiða um helgina en alls ekki allsráðandi, því fjöldi fjölbreyttra viðburða verður á seyði, m.a. fjölmargir tónleikar, lista- og náttúrulífssýningar og safnasýningar.

Sagt er frá nokkrum spennandi viðburðum hér en það er hvergi nærri tæmandi því Norðurland eystra hefur upp á margt að bjóða.

Boltanum sparkað af kappi

Ungir fótboltakappar fylla nú götur Akureyrarbæjar því þar hófst N1-mót Þórs fyrir 5. flokk í gær. Um er að ræða stærsta árlega knattspyrnumót landsins, sem tæplega 1.500 drengir frá 37 félögum víðsvegar um landið taka þátt í auk tæplega 400 liðsstjóra og þjálfara, að ótöldum þeim aðstandendum sem fylgjast með. Þetta er afmælismót því 25 ár eru liðin síðan mótið var haldið fyrst, árið 1987. Þá voru þátttakendur 160 talsins og hefur umfang mótsins því margfaldast.