Skúli Sigurður Ólafsson
Skúli Sigurður Ólafsson
Ingveldur Geirsdóttir ingveldur@mbl.is Minningar Guðrúnar Ebbu Ólafsdóttur eru falskar að mati bróður hennar Skúla S. Ólafssonar.
Ingveldur Geirsdóttir

ingveldur@mbl.is

Minningar Guðrúnar Ebbu Ólafsdóttur eru falskar að mati bróður hennar Skúla S. Ólafssonar. Skúli kom fram í Kastljósi Sjónvarpsins í gærkvöldi og ræddi þar um nýútkomna bók Guðrúnar Ebbu og lýsingar hennar á ítrekuðu kynferðisofbeldi sem faðir þeirra, Ólafur Skúlason, fyrrverandi biskups, hefði beitt hana.

Hann sagði systur sína fullkomlega einlæga í öllum sínum lýsingum. Það byggi mikil sannfæring að baki orðum hennar og hún lygi engu.

„Þessar minningar hennar, sem hún á, ég tel það afar sennilegt að þær séu ekki raunverulegar lýsingar á atburðum sem eiga að hafa gerst heldur sé þetta, sem er vel þekkt fyrirbæri innan sálfræði og geðlæknisfræði, sem kallast falskar minningar. Og byggist á því að einstaklingur, sem gjarnan er á miðjum aldri, hefur orðið fyrir miklu áfalli, fer í samtalsmeðferð sem hefur þær afleiðingar að minningar verða til og minningar halda áfram að verða til,“ sagði Skúli í Kastljósinu.

Hann sagði enn fremur heimilislífið hafa verið hefðbundið og föður þeirra ekki hafa haft þau tök á fjölskyldunni sem Guðrún Ebba lýsir í bók sinni.

Sendu frá sér yfirlýsingu

Í gær sendu Skúli, systir hans Sigríður Ólafsdóttir og móðir þeirra, Ebba Sigurðardóttir, frá sér yfirlýsingu þar sem þau gera alvarlegar athugasemdir við frásögn Guðrúnar Ebbu í nýútkominni bók og viðtölum við fjölmiðla. „Í upphafi bókarinnar segist hún ekki tilheyra lengur fjölskyldunni. Það var alfarið hennar ákvörðun og ekki í samræmi við vilja okkar.

Lýsing hennar á heimilislífi okkar er röng. Heimilið okkar einkenndist ekki af kúgun af hálfu föður okkar og eiginmanns, Ólafs Skúlasonar. Mál þetta hefur verið okkur og fjölskyldu okkar afar þungbært. Fram til þessa höfum við haldið okkur til hlés í þessari umræðu í þeirri von að henni myndi linna fyrr en síðar. Nú er svo komið að við getum ekki lengur orða bundist.

Við vörum við einhliða málflutningi og þöggun í þessu viðkvæma máli. Við hvetjum til þess að fram fari heiðarleg og fagleg umræða um bældar minningar af þeim toga sem Guðrún Ebba segir liggja til grundvallar ásökunum sínum.

Við teljum það siðferðilega skyldu okkar að standa vörð um þá sem ekki geta varið sig sjálfir og leiðrétta rangfærslur er okkur varða. Fyrst og fremst þá inniheldur frásögn Guðrúnar Ebbu lýsingar á heimilislífi og atburðum sem ekkert okkar þriggja kannast við,“ segir í yfirlýsingunni sem þau skrifa öll þrjú undir.