Vinsælt Rocky Horror var gríðarvinsælt en samt varð tap á sýningunni.
Vinsælt Rocky Horror var gríðarvinsælt en samt varð tap á sýningunni. — Morgunblaðið/Skapti Hallgrímsson
[ Smellið til að sjá stærri mynd ]
FRÉTTASKÝRING Skapti Hallgrímsson skapti@mbl.is Síðasta sýning gamanleiksins Svörtu kómedíunnar verður í kvöld hjá Leikfélagi Akureyrar.
FRÉTTASKÝRING

Skapti Hallgrímsson

skapti@mbl.is

Síðasta sýning gamanleiksins Svörtu kómedíunnar verður í kvöld hjá Leikfélagi Akureyrar. Margir hafa hlegið að því verki en staða félagsins er hins vegar fjarri því kómísk, þvert á móti býsna svört, og er aðalorsök þess talin frestun söngleiksins Rocky Horror í nokkra mánuði á sínum tíma. Þá var fjármálastjórn félagsins langt frá því nógu góð.

Launakostnaður nærri tvöfaldaðist vegna frestunarinnar, skv. úttekt sem gerð hefur verið fyrir bæjarráð Akureyrar, og tap á uppsetningu leikritsins varð 52,6 milljónir króna.

15.000 manns langt frá því nóg

Frumsýna átti Rocky Horror í Samkomuhúsinu í mars 2010 og hófust æfingar í janúar. Frumsýningu var hins vegar frestað til hausts og ákveðið að setja verkið upp í menningarhúsinu Hofi, sem vígt var síðsumars. Að sögn Sigmundar Ernis Rúnarssonar, alþingismanns og þáverandi formanns stjórnar Leikfélags Akureyrar, var það gert að beiðni bæjaryfirvalda og forráðamanna Hofs.

Rocky Horror var fyrsta leiksýning í Hofi, alls sáu söngleikinn um 15.000 manns, fleiri en nokkurt annað verk LA, en þrátt miklar vinsældir varð þetta gríðarlega tap á uppsetningunni, m.a. vegna ráðningar leikara og leikstjóra, og kostnaðar við kynningar. Kostnaður við sýninguna nam 87 milljónum króna en miðar voru seldir fyrir um það bil 34 milljónir.

Þegar í ljós kom, fyrir nokkrum mánuðum, að staða LA var miklum mun verri en talið var, var gripið í taumana og ákveðið að fara ofan í saumana á rekstrinum. Karl Guðmundsson, verkefnastjóri hjá bænum, og Jón Bragi Gunnarsson voru fengnir til verksins og skiluðu úttekt til bæjarráðs í vikunni.

Karl og Jón Bragi segja í úttektinni að fjárhagsleg vandræði LA hefjist með ráðningu leikhússtjóra og framkvæmdastjóra 2008. María Sigurðardóttir leikhússtjóri var ráðin fyrri hluta árs 2008 og Egill Arnar Sigurþórsson framkvæmdastjóri um mitt ár. María hætti störfum fyrir hálfum mánuði en Egill í sumar.

„Staða framkvæmdastjóra var ekki auglýst eins og áskilið er í samþykktum LA,“ segir í úttektinni, og bent er á að María hafði mjög litla reynslu af rekstri og fjármálum og Egill enga menntun á sviði fjármála og bókhalds, en einhverja reynslu.

Nefnd eru nokkur atriði sem einkum hafi farið úrskeiðis að mati Karls og Jóns Braga. Meðal annars þessi:

Samkvæmt samningi Akureyrarbæjar við LA frá 2006 skuli starfa hjá félaginu „aðili sem hefur þekkingu og reynslu á sviði rekstrar, fjármálastjórnunar og bókhalds“. Eftir þessu hafi ekki verið farið af hálfu stjórnar „en af hálfu Akureyrarbæjar voru heldur aldrei gerðar neinar athugsemdir við þessar ráðningar“.

Í úttektinni segir að það hefði verið eðlilegt verklag í svo umfangsmiklum rekstri að fá endurskoðanda á fund stjórnar fyrir hvern aðalfund til að fara yfir ársreikning hverju sinni og ræða stöðu mála. Að lágmarki hefði stjórnarformaður átt að hitta endurskoðendur vegna ársreiknings. Hvorugt hafi verið gert.

Vísbendingar

Þá er nefnt að leikhússtjóri hafi fengið allmargar kvartanir frá bókara LA, allt frá hausti 2010, um að bókhald félagsins væri ekki í lagi. Einnig höfðu leikhússtjóra og einstökum stjórnarmönnum borist upplýsingar um að ýmsir reikningar væru ógreiddir en engu að síður hefði ekkert verið aðhafst gagnvart framkvæmdastjóra fyrr en í byrjun júlí á þessu ári.

„Vissulega hafði leikhússtjóri þann fyrirvara við ráðningu sína að hún hefði ekki bókhaldslega þekkingu en hún hefði getað leitað sér aðstoðar endurskoðenda eða annarra sérfróðra manna til að kanna hvort fjármál og bókhald LA væri með eðlilegum hætti,“ segir í úttektinni.

FYRRVERANDI FORMAÐUR

Ráðningin var mistök

„Þetta er sorglegt mál og í raun mannlegur harmleikur. Ég hætti í stjórninni fyrir ári en miðað við það sem komið hefur á daginn var stjórnin jafnvel þegar á þeim tíma leynd lykilupplýsingum um fjárhagsstöðu félagsins og/eða fóðruð á röngum upplýsingum. Það er erfitt að taka réttar ákvarðanir þegar maður hefur rangar upplýsingar í höndunum,“ segir Sigmundur Ernir Rúnarsson, formaður stjórnar LA frá 2003 til 2009, við Morgunblaðið.

Spurður um þá gagnrýni í úttekt Karls og Jóns Birgis að staða framkvæmdastjóra hafi ekki verið auglýst svarar Sigmundur Ernir því til að víða hafi verið leitað fanga. „Það var engin launung á að ég vildi annan mann. En leikhússtjórinn hafði úrslitaáhrif um það hver var valinn og byggði þá ákvörðun sína á umsögnum meðmælenda og viðtölum við viðkomandi. Það má augljóst vera miðað við hvernig mál þróuðust að ráðningin á sínum tíma var mistök.“

Leiðrétting 28. nóvember - Vinsæl, ekki vinsælust

Skilja mátti á grein um Leikfélag Akureyrar í blaðinu á laugardag að fleiri hefðu séð Rocky Horror en nokkra aðra sýningu félagsins. Rétt er að Rocky er í einu af efstu sætunum, en fleiri sáu þó Fló á skinni, Fullkomið brúðkaup og Litlu hryllingsbúðina.