Þrír karlar á þrítugsaldri hafa játað að hafa brotist inn á tveimur stöðum í austurborginni aðfaranótt mánudags og stolið peningaskápum.

Þrír karlar á þrítugsaldri hafa játað að hafa brotist inn á tveimur stöðum í austurborginni aðfaranótt mánudags og stolið peningaskápum. Reyndar fóru þjófarnir tómhentir frá fyrri staðnum því ekki tókst þeim að opna peningaskápinn sem þar var að finna og eins reyndist hann of stór og þungur til að flytja á annan stað þar sem halda mætti verkinu áfram.

Þrátt fyrir þetta neituðu mennirnir að gefast upp enda brotavilji þeirra mjög einbeittur, segir í frétt frá lögrelgunni. Þeir fóru því í beinu framhaldi og brutust inn hjá öðru fyrirtæki á svipuðum slóðum en þar var að finna tvo peningaskápa, öllu minni, sem mennirnir tóku með sér af vettvangi. Þessu næst var ekið á afvikinn stað og þar voru skáparnir brotnir upp en í þeim báðum var að finna reiðufé. Því var skipt bróðurlega á milli mannanna sem síðan héldu til síns heima.

Skófar á vettvangi

Á litlu var að byggja við rannsókn málsins utan þess að skófar fannst á vettvangi. Það og brjóstvit lögreglumanna leiddi þó til þess að skömmu síðar var bankað upp á hjá manni sem hefur áður komist í kast við lögin. Sá kom svefndrukkinn til dyra og var lítt um þessa heimsókn gefið. Í forstofu hans var hins vegar að finna skó sem ástæða þótti til að skoða nánar og þá tók hringurinn að þrengjast en húsráðandi var handtekinn og fluttur á lögreglustöð.

Annar maður var vakinn skömmu seinna í öðru húsi á höfuðborgarsvæðinu en hann var sömuleiðis viðriðinn málið og því færður til yfirheyrslu. Hjá þeim báðum fundust peningar sem þeir höfðu stolið úr peningaskápunum. Þriðji maðurinn var svo handtekinn um hádegisbil og hafði þegar eytt sínum hluta af ránsfengnum, segir í frétt lögreglu.