Landið sækja þessa dagana heim margir af bestu matreiðslumönnum heims. Þeim er uppálagt að vinna úr íslensku hráefni sem hefur upp á svo margt að bjóða og er rómað fyrir hreinleika og gæði og þekkt sem slíkt víða um veröldina.
Landið sækja þessa dagana heim margir af bestu matreiðslumönnum heims. Þeim er uppálagt að vinna úr íslensku hráefni sem hefur upp á svo margt að bjóða og er rómað fyrir hreinleika og gæði og þekkt sem slíkt víða um veröldina. — Morgunblaðið/Kristinn
[ Smellið til að sjá stærri mynd ]
Matarmenningin blómstrar á Íslandi og um að gera að nýta það sem landið gefur af sér. Hráefni hreinleikans hefur mikla kosti sem rómaðir eru um veröld víða. Sumir hafa veislu í farangrinum og kynna krásirnar á veraldarvísu.

Matarmenningin blómstrar á Íslandi og um að gera að nýta það sem landið gefur af sér. Hráefni hreinleikans hefur mikla kosti sem rómaðir eru um veröld víða. Sumir hafa veislu í farangrinum og kynna krásirnar á veraldarvísu. Snjallasti leikurinn er auðvitað að bjóða gestum hingað heim eins og gert hefur verið undir merkjum hátíðinnar Food & Fun. Fremstu meistarakokkar sækja landið heim og töfra fram rómaða sælkerarétti. Hátíðin er vinsæl meðal Íslendinga og erlendum gestum fjölgar stöðugt; bæði fjölmiðlamönnum og fólki sem elskar að bragða framandlegustu rétti Frónbúa.

Svanfríður Anna Lárusdóttir

Matarmenningu hefur fleygt fram

„Þar sem tilgangur Food&Fun hátíðarinnar er m.a. að vekja athygli á gæðum íslensks hráefnis, og matvælaframleiðslu er ljóst að vörur Mjólkursamsamsölunnar skipa sess á matseðli allra veitingahúsanna sem taka þátt í hátíðinni. Við höfum alla tíð lagt mikla áherslu á nýsköpun og vöruþróun og gott samstarf við íslenska matreiðslumenn. Það er því kærkomið að fá heimsóknir erlendra matreiðslumanna sem vinna með íslenskar mjólkurafurðir,“ segir Svanfríður Anna Lárusdóttir sölufulltrúi hjá MS.

Food&Fun hefur öðlast fastan sess í vetrardagskrá Reykjavíkur. „Við ættum einmitt að blása til sóknar á þessum árstíma og bjóða upp á séríslenska viðburði,“ segir Svanfríður Anna. „Aðsókn Íslendinga er reyndar svo mikil að stundum er gantast með það í veitingahúsageiranum að erlendir ferðamenn eigi erfitt með að fá borð og þurfi að bíða tímunum saman eftir máltíð. Fjölbreytni einkennir hátíðina í ár og hún ber það með sér hvað matarmenningu okkar hefur fleygt fram síðasta áratuginn. Ég er ekki í vafa um að Food&Fun á þátt í þeirri framþróun.“

En hvað er það besta sem býðst? Fullkominn matseðill er spennandi sjávarréttaforréttur sem kemur bragðlaukunum á óvart, segir Svanfríður. „Aðalrétturinn er íslenskt lambakjöt og toppurinn ef sósan er rjómalöguð. Mér finnst alltaf jafn gaman þegar ég sé nýjar útfærslur af skyreftirréttum. Matreiðslumennirnir okkar eru óþreytandi að halda þessum séríslenska eftirrétti á lofti. Og þar sem ég er ekki mikið fyrir sætindi þá væri toppurinn ef hægt væri að fá að smakka góða osta í lokin,“ segir Svanfríður sem kveðst ekki vilja missa af lokakeppni þeirra þriggja matreiðslumanna sem keppa munu til úrslita sem Food and Fun-matreiðslumaður ársins í Hörpunni á laugardeginum. Sú viðureign muni verða spennandi og skemmtileg.

Guðný Káradóttir

Laða fram það besta úr hráefni

Food & Fun hefur mikla þýðingu fyrir íslenska ferðaþjónustu og matarmenningu, segir Guðný Káradóttir markaðsstjóri Íslandsstofu. „Matarmenning er þema kynningarstarfs okkar í febrúar og mars og því fellur Food & Fun vel að starfi okkar. Íslandsstofa leggur áherslu á að kynna Ísland sem upprunaland hágæðahráefnis og matvæla á erlendum mörkuðum. Þetta verkefni er því tilvalinn vettvangur til að laða fram það besta sem íslenska hráefnið býður,“ segir Guðný

Með þátttöku erlendra sem verða að störfum á íslenskum veitingahúsum með íslenskum kokkum mætast menningarstraumar. „Þarna fáum við skemmtilega útkomu,“ segir Guðný. „Við nýtum jafnframt tækifærið og bjóðum til landsins erlendum blaðamönnum sem kynnast íslenskri matarmenningu og fjalla um hana í erlendum miðlum; segja sögur af upplifun sinni. Við munum jafnframt nýta okkur samstarfið við Food & Fun í nýju átaki innan Inspired by Iceland sem við köllum Eldhús: Iceland‘s Little House of Food. Þann 5. mars verður átakinu formlega ýtt úr vör með farandeldhúsi sem verður ferast með um landið ásamt gestgjafa sem býður erlendum ferðamönnum að bragða á veislumat úr íslensku hráefni á vinsælum áfangastöðum um landið. Fáum einmitt einn þeirra matreiðslumanna sem koma á Food & Fun til að elda úr íslenskum hráefnum fyrir ferðamenn sem njóta veitinganna í Eldhúsinu.“

Hvað vekur áhuga Guðnýjar sjálfrar? Hvaða viðburði á Food & Fun ætlar hún að sækja?

„Ég er hrifnust af fiski. Bíð spennt eftir að sjá matseðla veitingastaðanna til að geta valið úr.Ætla síðan að fara í Hörpuna laugardaginn 3. mars þar sem lokakeppnin fer fram. Þar verður eingöngu eldað úr íslensku hráefni og verður gaman að sjá hvernig erlendu kokkunum tekst upp enda hafa fæstir eldað úr íslensku hráefni áður. “

Hreiðar Þór Jónsson

Vínið gerir ferðalagið spennandi

„Samstarf Vífilfells og Food&Fun er ákveðinn gæðastimpill fyrir Vífilfell sem sýnir hversu mikilvæg við erum á þessum markaði. Vífilfell er með þekktustu vörumerki landsins í bjór og gosi en hefur á undanförnum árum byggt upp eina af sterkustu víndeild á landinu með gríðarlega fjölbreytt og gott úrval,“ segir Hreiðar Þór Jónsson sem er markaðsstjóri áfengis hjá Vífilfelli.

„Food&Fun er einn af hápunktum ársins í ferðaþjónustu og matarmenningu þar sem verður til góð blanda af Íslendingum og erlendum ferðamönnum á flottustu veitingastöðum landsins,“ segir Hreiðar. Hann segir engan einn ákveðinn hápunkt á hátíðinni heilla sig öðrum fremur en gaman sé þó að sjá árangursríkt samstarf matreiðslumeistara og vínþjóna.

„Oft er það rétt val á drykkjum með matnum sem ég er hrifnastur af. Mæli því með því að fólk velji vínpakka með matnum til að gera ferðalagið enn meira spennandi. Helst vildi ég að hátíðin stæði lengur yfir þannig að maður gæti prófað fleiri staði. Það taka nokkrir nýir áhugaverðir taka þátt í fyrsta skipti sem er spennandi. Matreiðslumeistararnir sem eru að koma til landsins eru allir svakalega færir þannig að erfitt er að gera upp á milli staðanna. En líklega verður maður að fara að panta borð til að missa ekki af lestinni. Food&Fun er líka gluggi fyrir Vífilfell á erlenda markaði með Víking vörumerkið sem hefur verið að hasla sér völl erlendis auk bjórsins Einstök, sem við framleiðum fyrir erlenda aðila og hefur fengið góða dóma í Bretlandi og Bandaríkjunum. Eftir hátíðina í fyrra fengum við töluvert af fyrirspurnum um Pils Organic sem er fyrsti og reyndar eini lífræni bjórinn sem framleiddur er á Íslandi. Það er mikil gróska hjá okkur og fjölmargar nýjungar sem gætu farið fram hjá fólki ef ekki væri fyrir hátíð eins og Food&Fun.“

Sif Gunnarsdóttir

Kokkarnir hafa áhrif á Íslandi

„Food & fun er uppákoma sem er farin að skipta Íslendinga verulegu máli. Hátíðina sækja fulltrúar fjölmargra virtra erlendra fjölmiðla, blaða, tímarita og sjónvarpsstöðva, sem skrifa um matarmenningu af þekkingu og komast virkilega vel frá sínu. Rétt eins og kokkarnir sem hingað koma þá eru blaðamennirnir frá Bandaríkjunum, Evrópu og Norðurlöndunum og auðvitað munar um landkynningu þeirra,“ segir Sif Gunnarsdóttir, forstöðumaður Höfuðborgarstofu.

Matur er stór þáttur í menningu hverrar þjóðar og á ríkan þátt í að skapa orðspor hennar. Íslendingar ætla sér stóra hluti með alþjóðlegu ráðstefnuhaldi og verða, að mati Sifjar, því að geta tekið á móti gestum af reisn og vera þekktir fyrir að bjóða fólki annað og meira en hafragraut og pylsur á Bæjarins bestu – svo hlutirnir séu ýktir aðeins.

„En svo skiptir hátíð á borð við Food & fun líka miklu máli fyrir landann. Margir hafa gert sér glaðan dag þessa daga og farið út að borða enda bjóða veitingastaðirnir hér í Reykjavík afsláttarverð á matseðlinum þessa helgi, nú þegar heimsfrægir meistarakokkar eru á svæðnu. Núna kemur hingað til dæmis Ben Pollinger frá Ney York og verður á Nítjándu í Kópavogi. Ég hef flest árin sem hátíðin hefur verið haldin farið út á borða, meðal annars þegar Pollinger var á Einari Ben og það er því forvitnilegt að sjá hvað hann er með á matseðlinum núna. Þá er ég líka spennt fyrir því hvað Daninn Claus Henriksen býður, en hann í heimalandi sínu þekktur sem matreiðslumeistari í Dragsholm Slot á vesturströnd Sjálands. Og almennt talað er gaman að sjá og finna hvernig þessir erlendu veitingamenn vinna úr íslensku hráefni og ekki síður að fylgjast með hvernig áhrif þeirra á íslenska matarmenningu verða í fyllingu tímans,“ segir Sif að síðustu.

Guðmundur Óskarsson

Viðburður sköpunargleðinnar

Íslensk matargerð og hráefni hefur mikla þýðingu fyrir ferðaþjónustuna hér á landi. Hér á bæ fylgjumst við nákvæmlega með umfjöllun um Ísland í erlendum miðlum og á Netinu og sé hún sett upp línulega þá er kúrfan upp á við eftir hátíðina, þegar greinar erlendra blaðamanna sem hátíðina sækja birtist. Slík kynning ræður miklu þegar fólk á ferðinni ákveður að fara til Íslands,“ segir Guðmundur Óskarsson forstöðumaður markaðs- og viðskiptaþróunar Icelandair. Fyrirtækið hefur verið einn af helsti bakhjarl Food & fun og telur Guðmundur reynsluna góða.

Matur og veitingastaðir eru stór hluti af þeirri upplifun að ferðast. Food & fun kemur þessari upplifun á framfæri með skemmtilegum og áhrifaríkum hætti sem skiptir miklu máli fyrir íslenska matargerð og ferðaþjónustu. Segist Guðmundur hafa sérstaklega gaman af því þegar íslenskt hráefni mæti sköpunargleði mismunandi matreiðslumanna af ólíkum þjóðernum. Food & Fun ýti undir slíkt og sé á sinn hátt listviðburður.

Guðmundur segist munu eftir megni reyna að sækja einhverja þá viðburði sem haldnir verða undir merkjum Food & fun. „Ég ætla til dæmis að hitta á meistarakokkinn Jennifer Jasinski, sem verður á Kolabrautinni í Hörpunni. Jasinski rekur þrjá veitingastaði í Denver í Colorado. Icelandair hefur flug til Denver 10. maí nk. þannig að ég sé þarna kjörið tækifæri til að ná smá forskoti á sæluna, en þar í borg eru reknir margir skemmtilegir veitingastaðir og skemmtileg matarmenning setur sinn svip á mannlíf í borginni. Sjálfur var ég þar vestra fyrir um mánuði og mér fannst gaman að koma til dæmis á staði sem bjóða gestum sínum kjöt af vísundum. Ég gæti raunar nefnt margt fleira skemmtilegt þarna að vestan og vonandi fá gestir Food and fun að kynnast einhverju af því,“ segir Guðmundur að síðustu.