Baldur Arnarson baldura@mbl.is Þingflokkur Sjálfstæðisflokksins leggur til að tímabundið verði dregið úr álögum á bensín og eldsneyti svo skilyrði skapist til að lækka lítraverðið niður í u.þ.b. 200 krónur.
Baldur Arnarson

baldura@mbl.is

Þingflokkur Sjálfstæðisflokksins leggur til að tímabundið verði dregið úr álögum á bensín og eldsneyti svo skilyrði skapist til að lækka lítraverðið niður í u.þ.b. 200 krónur.

Tillagan er lögð fram í tveimur breytingatillögum á lögum um eldsneytisverð og á lækkunin að gilda frá 1. apríl til 31. desember. Með tillögunni fylgir greinargerð og segir þar í niðurlagi að lækkunin myndi auka ráðstöfunartekjur, örva hagvöxt og leiða til lækkunar vísitölu neysluverðs „sem aftur lækkar höfuðstól verðtryggðra lána heimila og fyrirtækja og afborganir af þeim“.

Er lækkunin jafnframt sögð mundu virka sem vítamínsprauta á ferðaþjónustuna og minnka flutningskostnað og þar með vöruverð.

Í greinargerðinni er áætlað að tekjur ríkisins af sölu á bensíni og díselolíu frá og með 1. apríl til 31. desember nk. verði samanlagt um 28.200 milljónir króna. Haldist notkunin óbreytt munu skatttekjurnar aukast enda er olíuverðið á uppleið.

Aðspurður um þróunina bendir Hermann Guðmundsson, forstjóri N1, á að tonnið af bensíni hafi hækkað úr 1.000 Bandaríkjadölum í 1.100 dali síðustu viku. Díselolían hafi hækkað en þó ekki jafnmikið.

„Við höfum séð snarpar hækkanir. Fyrir vikið hefur skapast hækkunarþörf. Við gætum séð bensínlítrann hækka í allt að 260 kr. næstu daga.“

Dragi úr álögum
» Í tillögum sjálfstæðismanna er m.a. gert ráð fyrir að sérstakt bensíngjald og almennt bensíngjald lækki um tugi kr.
» Bent er á að ríkið taki til sín um 119,5 kr. af bensínlítra sem kostar 246,89 kr., eða tæplega helming af útsöluverði.