27. júlí 2013 | Í dag | 272 orð | 1 mynd

Merkir Íslendingar

Jóhannes Jósefsson

Jóhannes á Borg, glímukappi, ungmennafélagsfrömuður og hótelhaldari fæddist í Hamarkoti á Oddeyri 28.7. 1883. Hann var sonur Jósefs keyrara þar Jónssonar, bónda í Hamarkoti, Jónssonar, og k.h.
Jóhannes á Borg, glímukappi, ungmennafélagsfrömuður og hótelhaldari fæddist í Hamarkoti á Oddeyri 28.7. 1883. Hann var sonur Jósefs keyrara þar Jónssonar, bónda í Hamarkoti, Jónssonar, og k.h., Kristínar Einarsdóttur sem var ættuð frá Geirþjófsstöðum og Sandi í Þingeyjarsýslu. Bróðir Jósefs keyrara var Magnús keyrari, faðir Sigursteins, forstjóra SÍS í Edinborg, föður Magnúsar Magnússonar, fyrrv. sjónvarpsmanns hjá BBC.

Jóhannes ólst upp við fátækt og basl í Lundi á Oddeyri, var skikkaður í prentnám en hvarf frá því og lærði verslunarfræði í Noregi. Þar kynntist hann ungmennafélagshugsjóninni og 1906 stofnuðu hann og Þórhallur Bjarnason prentari fyrsta ungmennafélagið, Ungmennafélag Akureyrar. Hann beitti sér fyrir stofnun fleiri slíkra félaga og Ungmennafélags Íslands.

Hann varð glímukóngur Íslands 1907 og 1908 og fyrirliði íslenska liðsins á Ólympíuleikunum í London 1908. Jóhannes dvaldi síðan erlendis lengst af til 1927 þar sem hann sýndi íslenska glímu, sjálfsvörn og aðrar aflraunir. Heim kominn hóf hann undirbúning að byggingu Hótel Borgar sem átti að verða tilbúin fyrir þúsund ára afmæli Alþingis árið 1930. Það tókst og var hótelið opnað þrátt fyrir hrakspár margra sem töldu þessa hugmynd ansi fífldjarfa. Fyrsta skóflustungan var tekin í byrjun október 1928 og voru veitingasalirnir opnaðir í byrjun árs 1930 og gistiaðstaðan tekin í gagnið í lok maí sama ár. Jóhannes átti og rak Hótel Borg til 1960 þegar hann settist í helgan stein.

Jóhannes var glæsimenni og heimsborgari, víðlesinn og var hrifinn af fagurbókmenntum sem hann las á mörgum tungumálum.

Kona Jóhannesar var Karólína Amalía Guðlaugsdóttir, f. 14.12. 1882, d. 11.8. 1969. Foreldrar hennar voru Guðlaugur Guðmundsson, bæjarfógeti á Akureyri, og k.h., Oliva Maria frá Skáni í Svíþjóð, fædd Suenson.

Jóhannes á Borg lést 5.10. 1968.

Aðgangsupplýsingar

Notandi:Þú ert ekki innskráð(ur).
Greinin: Þessi grein er ókeypis þar sem hún er eldri en þriggja ára.
Morgunblaðið - fyrsta forsíðan

Morgunblaðið hjá Landsbókasafni

Á vefnum timarit.is er að finna stafrænt safn Landsbókasafns yfir helstu dagblöð og tímarit landsins. Þetta er eina leiðin til að leita að efni úr Morgunblaðinu frá því fyrir 1986.