Eyþór Jóhann Hallsson fæddist á Hofsósi 4.8. 1903. Foreldrar hans voru Hallur Einarsson, f. 15.10. 1870, og Friðrikka Jóhannsdóttir, f. 5.7. 1873. Eiginkona, 28.10. 1927, var Ólöf Jónsdóttir, f. 16.5. 1900, frá Rifkelsstöðum í Eyjafirði.

Eyþór Jóhann Hallsson fæddist á Hofsósi 4.8. 1903. Foreldrar hans voru Hallur Einarsson, f. 15.10. 1870, og Friðrikka Jóhannsdóttir, f. 5.7. 1873. Eiginkona, 28.10. 1927, var Ólöf Jónsdóttir, f. 16.5. 1900, frá Rifkelsstöðum í Eyjafirði. Barn þeirra dó í fæðingu 9.6. 1929. Fósturdóttir, 1929, Karólína F. Hallgrímsdóttir, f. 26.7. 1921 á Akureyri. Fjölskyldan fluttist til Siglufjarðar 1930.

Eyþór gekk í barnaskóla og einn vetur í unglingaskóla á Hofsósi. Hann var elstur fimm systkina: „ og bar því þeim fremur að létta undir með vinnufúsum en fátækum foreldrum “ – svo vitnað sé í Eyþór sjálfan. Faðir Eyþórs stundaði hákarlaveiðar á vetrum og á vorin en var formaður á mótorbátum á sumrin: „Ég var því hinn veikburða húsbóndi í löngum fjarverum hans, eignaðist ungur smá pramma og réri á honum út fyrir landsteinana til að afla bjargar í búið. Saltaði og spyrti aflann og seldi svo góðum bændum upp á gamla móðinn í vöruskiptum.“ Eyþór lauk prófi frá Stýrimannaskóla Reykjavíkur 1927 og var talsvert við eigin útgerð riðinn til l936 og nafnkenndur skipstjóri í flotanum fram til 1945. „Ég hef átt því láni að fagna ásamt mínum skipshöfnum að færa á land mestan síldarafla sem fengizt hefur á vestfirzkt skip og Vestmannaeyjaskip.“ Eyþór veiktist af berklum og var tekinn úr brúnni 1.6. 1945 og fluttur á Vífilsstaði þar sem hann var næstu 14 mánuði. Hann læknaðist að fullu með lungnaskurði í Noregi þar sem hann dvaldi 1954-56. Eyþór starfaði við Síldarleitina 1947 og var einn af þremur í stjórn þegar Bæjarútgerð Siglufjarðar var stofnuð og forstjóri hennar til 1953, og sat í ýmsum nefndum. Hann fékkst við síldarsöltun og umsjá með skipum, erlendum og innlendum, var umboðsmaður Skeljungs hf. á Siglufirði 1958-88, vararæðismaður Noregs þar og meðeigandi og framkvæmdastjóri ms. Siglfirðings. Sæmdur gullpeningi Sjómannadagsins og riddari af St.Olavs-orðunni. Eyþór lést 4.2. 1988.