23. febrúar 2014 | Sunnudagsblað | 526 orð | 4 myndir

Vefsíðan www.GuidetoIceland

Markaðstorg ferðalanga

— Morgunblaðið/Halldór Kolbeins
[ Smellið til að sjá stærri mynd ]
Fyrir ríflega ári tók hópur ferðaglaðra vina sig saman og ýtti úr vör fyrirtækinu Guide to Iceland, sem rekur samnefnda vefsíðu. Þrátt fyrir ungan aldur hefur vegur fyrirtækisins vaxið hratt og hlaut það á dögunum sín önnur Nexpo-netverðlaun. Gunnhildur Ásta Guðmundsdóttir gunnhildur@mbl.is
Að sögn Elmars Johnson framkvæmdastjóra má rekja upphafið að fyrirtækinu til þess að stór vinahópur, sem samanstóð af ungum Íslendingum sem áttu það meðal annars sameiginlegt að hafa verið iðnir við að ferðast, kom auga á glufu í markaðsumhverfinu þegar kom að skipulagningu ferðalaga einstaklinga hingað til lands. „Hér var augljós skortur á miðlægu bókunarkerfi fyrir alla þá vöru, afþreyingu og þjónustu sem er í boði innan ferðaiðnaðarins hér á landi. Við sáum tækifæri í að sameina þessa þætti á eitt miðlægt markaðstorg – sem myndi auðvelda ferðalöngum á leið til Íslands alla þeirra leit og kaup,“ segir Elmar.

Hópurinn fékk strax nokkra aðila úr ferðaþjónustunni til liðs við sig, þ.e. aðila af öllum stærðum og gerðum, sem sáu hag í að koma sér á framfæri á markaðstorginu. Vefsíðunni www.guidetoiceland.is var síðan hleypt af stokkunum í janúar 2013 en þar er að finna ógrynni upplýsinga um afþreyingu, vörur og þjónustu, sem stendur erlendum ferðamönnum til boða hér á landi, auk þess sem einnig er að finna þar ítarlegt safn greina og pistla um land og þjóð.

Skipti engum togum að vefsíðan hlaut Nexpo-verðlaunin sem „Vefsíða ársins 2012“ í upphafi síðasta árs, en verðlaunin eru árlega veitt þeim fyrirtækjum sem þykja skara fram úr á netinu.

Mikilvægi þess að þekkja heimamenn

Annað sem stofnhópurinn lagði mikið upp úr, við þróun vefjarins, var verðmæti þess að tengja saman ferðalanga og heimafólk. „Allir ferðalangar átta sig á gildi þess að þekkja einhvern innfæddan, sem þekkir vel til, í viðkomandi landi. Við áttuðum okkur líka á að það er hægara sagt en gert að komast í samband við Íslendinga, ef þú þekkir ekki til einhvers fyrir,“ segir Elmar. „Við bjuggum því til ferðasamfélagið „Contact a local“ en þar býðst öllum sem búsettir eru hér á landi, kostur á að taka þátt í ferðaiðnaðinum endurgjaldslaust,“ bætir hann við. Að sögn Elmars gefst þessum aðilum kostur á að fara í fríar ævintýraferðir og skapa sér tekjur, með því einu raunar að vera hjálpsamir og vingjarnlegir við þá ferðamenn sem setja sig í samband við þá.

Önnur verðlaun og metheimsóknir

Í dag er vefsíðan orðin að samstarfsvettvangi yfir 80 aðila, bæði fyrirtækja og einstaklinga í ferðaþjónustu hér á landi. Henni hefur líka verið vel tekið af ferðalöngum en í janúar síðastliðnum var heimsóknarmet slegið þegar yfir 100 þúsund notendur heimsóttu síðuna að staðaldri. Vörumerkið Guide to Iceland varð einnig nýverið eitt stærsta íslenska vörumerkið bæði á Facebook og Google+ en félagsnet vefsíðunnar á samfélagsmiðlum telur nú yfir 180 þúsund fylgjendur. Það kemur því kannski ekki á óvart að fyrirtækið hlaut á dögunum Nexpo-verðlaunin öðru sinni, í þetta sinn sem „áhrifamesta fyrirtækið á samfélagsmiðlum 2013.“

Elmar er bjartsýnn á framtíðina en heimsóknum heldur áfram að fjölga og þátttakendur bætast við. „Við bjóðum alla velkomna í ferðasamfélagið okkar endurgjaldslaust. Þannig teljum við okkur færa ferðaiðnaðinn nær fólkinu í landinu,“ bætir hann við.

Í lokin er við hæfi að spyrja hvernig starf framkvæmdastjóra slíks sprotafyrirtækis fari með hinu starfi Elmars, en hann er einnig læknir á Landspítalanum. „Þetta hefur gengið vonum framar. Bæði störfin innihalda áhugaverð og skemmtileg viðfangsefni – sem tvinnast ágætlega saman þrátt fyrir að vera ólík,“ segir hann léttur í bragði að endingu.

Aðgangsupplýsingar

Notandi:Þú ert ekki innskráð(ur).
Greinin: Þessi grein er ókeypis þar sem hún er eldri en þriggja ára.
Morgunblaðið - fyrsta forsíðan

Morgunblaðið hjá Landsbókasafni

Á vefnum timarit.is er að finna stafrænt safn Landsbókasafns yfir helstu dagblöð og tímarit landsins. Þetta er eina leiðin til að leita að efni úr Morgunblaðinu frá því fyrir 1986.