Í heimahöfn Sigurður siglir inn í Vestmannaeyjahöfn um hádegisbilið í gær. Fljótlega verður haldið á makrílveiðar.
Í heimahöfn Sigurður siglir inn í Vestmannaeyjahöfn um hádegisbilið í gær. Fljótlega verður haldið á makrílveiðar.
[ Smellið til að sjá stærri mynd ]
Sviðsljós Ómar Garðarsson omar@eyjafrettir.is Við höldum hátíð hér í Vestmannaeyjum í dag til að fagna nýjum Sigurði – flaggskipi Ísfélags Vestmannaeyja hf.

Sviðsljós

Ómar Garðarsson

omar@eyjafrettir.is

Við höldum hátíð hér í Vestmannaeyjum í dag til að fagna nýjum Sigurði – flaggskipi Ísfélags Vestmannaeyja hf. Skipið hefur hlotið einkennisstafina VE 15 eins og forverinn sem seldur var til niðurrifs í fyrra eftir ríflega 50 ára farsæla þjónustu,“ sagði Gunnlaugur Sævar Gunnlaugsson, stjórnarformaður Ísfélagsins, þegar hann ávarpaði gesti við komu Sigurðar VE í gær. Er Sigurður ekki bara flaggskip Ísfélagsins heldur alls Eyjaflotans sem langstærsta skip í eigu Eyjamanna.

Sigurður er á allan hátt hið glæsilegasta skip og aðbúnaður áhafnar líkastur því sem gerist á fyrsta flokks farþegaskipum.

Fyrirmynd og forysta í endurnýjun skipaflotans

Gunnlaugur Sævar sagði það einstakt ánægjuefni að taka á móti svo glæsilegu skipi sem bæri þetta gæfuríka nafn. Sigurðarnafnið hefði verið tengt skipum eigenda Ísfélagsins um áratuga skeið og alltaf verið tengt árangri og sigrum.

„Eigendur þessa elsta hlutafélags landsins hafa enn og aftur sýnt þann staðfasta vilja sinn og stórhug í verki að vera í fremstu röð. Þeir hafa sýnt að vilji þeirra stendur til að byggja upp alþjóðlegt sjávarútvegsfyrirtæki sem ætlað er að vera í fararbroddi á veraldarvísu í öllum þáttum síns rekstrar hvort sem er til sjós eða lands.“

Gunnlaugur Sævar sagði Sigurð VE 15 gott vitni um það eins og aðrar fjárfestingar Ísfélagsins, í Vestmannaeyjum og á Þórshöfn. Þær skipti milljörðum á ári og miði að því að nýta betur aflann sem að landi berist. „Við höfum líka fjárfest í markaðsstarfi erlendis og rekum öflugt sölufélag fyrir Austur-Evrópu með vinum okkar í Skinney Þinganesi. Sigurður VE er annað skipið sem við smíðum á örfáum árum og hefur félagið verið öðrum fyrirmynd og forysta í endurnýjun skipaflotans,“ sagði Gunnlaugur Sævar og á þarna við Heimey VE sem kom ný árið 2012.

Gunnlaugur sagði Ísfélagið hafa af fremsta megni reynt að vanda sig í ákvörðunum og framkvæmd þeirra. Glímt við sveiflur í náttúrunni eins og loðnubrest á þessu ári. „Við höfum á liðnum árum notið hás verðs á erlendum mörkuðum og ég er sannfærður um að svo verður áfram.

En þá þurfum við líka að fjárfesta áfram í rekstrinum til að tryggja að við getum ávallt boðið upp á það besta. Það myndi sjálfsagt kosta um 50 til 60 milljarða króna að byggja Ísfélag Vestmannaeyja upp í dag í sinni mynd. Þar sjá menn hversu fánýtt tal það er að þörf sé á „nýliðun í greininni“, sagði Gunnlaugur Sævar og nefndi að ýmislegt mætti betur fara í umgjörð sjávarútvegs en þetta væri gleðistund.

Upphafið að nýrri sókn

„Við ætlum að láta þennan gleðidag verða upphafið að sókn okkar. Að nýrri sókn Vestmannaeyja og vonandi landsbyggðarinnar allrar gegn því liði sem heldur að verðmætin verði til á hjólastígum í póstnúmerinu 101.“

Næst ávarpaði hann skipstjórann Hörð Má Guðmundsson sem hann lýsti sem reynslumiklum dugnaðarforki „Honum er falin stjórn þessa skips ásamt áhöfn sinni. Ég er þess fullviss að hann mun axla þá ábyrgð með glæsibrag og leysa verk sitt vel af hendi eins og önnur sem honum hafa verið falin. Ég óska honum og áhöfn hans til hamingju með nýja starfsstöð. Við óskum ykkur guðsblessunar. Megið þið verða fengsælir og umfram allt farsælir.“

Að lokum sagði Gunnlaugur Sævar að margir hefðu komið að verki og það bæri að þakka. „Hinum stórhuga eigendum Ísfélags Vestmannaeyja, starfsmönnum þess, Vestmannaeyingum og Þórshafnarbúum óska ég innilega til hamingju með þetta stórkostlega skip Sigurð VE 15.“

„Gleðidagur fyrir fjölskylduna og Ísfélagið“

Það var margt um manninn við Vestmannaeyjahöfn þegar nýr Sigurður VE 15, nýtt skip Ísfélags Vestmannaeyja, kom í fyrsta skipti til heimahafnar í hádeginu í gær. Sigurður er eitt glæsilegasta skip íslenska fiskiskipaflotans og þó að víðar væri leitað. Skipið fer á makrílveiðar eftir nokkra daga.

Sigurður er smíðaður í Tyrklandi og er 3.763 bróttólesta uppsjávarskip, 80,3 metra langur og 17 metra breiður og burðargetan er rétt um 3.000 tonn. Aðalvél er af gerðinni Wartsila, 6.200 hestöfl. Í skipinu eru íbúðir fyrir 22 í fimmtán klefum.

Þegar Sigurður hafði lagst að bryggju flutti Gunnlaugur Sævar Gunnlaugsson, stjórnarformaður Ísfélagsins, tölu og séra Guðmundur Örn Jónsson, prestur Landakirkju, flutti bænarorð og afhenti skipi og áhöfn bænarskjöld. Geir Jón Þórisson frá Gideonfélaginu færði svo áhöfninni 22 eintök af Nýja testamentinu. Á eftir var skipið til sýnis og veitingar í boði útgerðarinnar.

Ný viðmið í útgerðarsögunni

Skip eins og Sigurður hlýtur að setja ný við mið í sögu fiskiskipaútgerðar á Íslandi. Spil, tromlur fyrir troll, kranar og annar búnaður á dekki er að sjá mjög öflugur. Íbúðir eru rúmgóðar og stærstu klefarnir eru á við þokkalegar einstaklingsíbúðir. Allt mjög vandað og í borðsal og setustofum eru falleg og þægileg húsgögn.

Brúin með sínum 22 skjáum og stórum gluggum allan hringinn minnir helst á flugturn á stórum flugvelli. Þar fyrir ofan er „skylobbyið“ hugguleg setustofa sem myndi sóma sér vel á fjögurra stjörnu hóteli.

Vélarrúmið er risastórt með aðalvélinni í miðjunni og til hliðar er stór vaktklefi einangraður frá hávaðanum í vélarrúminu. Þar er hægt að fylgjast með á mælum og stjórna öllum búnaði.

Merkur áfangi

Guðbjörg Matthíasdóttir, sem er aðaleigandi Ísfélags Vestmannaeyja hf. ásamt fjölskyldu, tók á móti Sigurði VE 15, nýju skipi félagsins ásamt fjölskyldu sinni, vinum, stjórn og starfsfólki félagsins í gær. Tók hún við og festi fyrstu landfestina ásamt barnabörnunum.

„Þetta er mikill gleðidagur fyrir okkur fjölskylduna og Ísfélagið,“ sagði Guðbjörg við Morgunblaðið. „Það er merkur áfangi að taka á móti glæsilegu nýju uppsjávarskipi sem er búið þeim besta búnaði sem völ er á. Meðal annars öflugu kælikerfi sem eykur gæði og um leið aflaverðmæti. Skipið heldur fljótlega á makrílveiðar. Við óskum skipi og áhöfn velfarnaðar,“ sagði Guðbjörg.

Sem best hráefni að landi

Svanur Gunnsteinsson, yfirvélstjóri á Sigurði VE, hefur í mörg ár verið á skipum Ísfélagsins. Var á Álsey VE og fór þaðan yfir á Heimaey VE sem kom ný til landsins í maí 2012. „Þar var ég yfirvélstjóri og nú er ég kominn yfir á Sigurð og munurinn er sá að þetta er allt númeri stærra,“ sagði Svanur um nýja vinnustaðinn sinn.

Aðalvélin er 6.200 hestöfl. Vélbúnaður er allur af nýjustu gerð og er vélarrúmið það sem kallað er vaktfrítt. „Við erum tveir vélstjórarnir og þurfum ekki að ganga vaktir þó að við fylgjumst alltaf með. Við þurfum líka að fylgjast með kælikerfinu en í Sigurði eru tólf kælitankar, samtals 2.970 rúmmetrar og kæligetan er 2,6 milljón kílókalóríur sem er með því mesta sem til er. Þetta gengur út á að koma með sem best hráefni að landi og þarf þá kæla aflann eins hratt og hægt er, það er númer eitt, tvö og þrjú hjá okkur.“

Svanur er mjög ánægður með reynsluna af Sigurði, segir hann skemmtilegt og gott skip. Vélin er keyrð á svartolíu og rafmagnsframleiðslan er 2,5 MW. „Það gekk allt mjög vel á heimleiðinni enda allt mjög öflugt, skip, vélar, tæki og allur búnaður á dekki eins og spil og tromlur,“ sagði Svanur.

„Allt stærra, fullkomnara og kraftmeira“

„Munurinn er mikill, Þorsteinn ÞH var smíðaður 1988 og hér erum við að koma með mun stærra og öflugra skip sem búið er fullkomnasta og besta búnaði og tækjum sem völ er,“ sagði Hörður Már Guðmundsson, skipstjóri á nýjum Sigurði.

„Jú, þetta eru mikil viðbrigði, allt stærra, fullkomnara og miklu kraftmeira. Sigurður er meira en helmingi stærri en Þorsteinn sem var 1.800 brúttótonn en sá nýi er 3.763 brúttótonn.“

Sigurður kemur með ferskan afla að landi sem geymdur er í þar til gerðum kælitönkum. „Við erum með fullkomnasta kælikerfi sem hægt var að fá og það stærsta um borð í íslensku fiskiskipi. Allar vélar, spil, kranar og tækjabúnaður er sá besti og fullkomnasti,“ sagði Hörður sem hefur 20 skjái fyrir framan sig í risastórri brúnni.

„Þetta eru dýptarmælar og asdic sem segja manni hvað er að finna í sjónum og hvernig ástandið er, hitastig og annað sem kemur að notum við veiðarnar. Ég get svo flakkað á milli skjáa allt eftir því á hvaða veiðiskap við erum.“

Heimsiglingin gekk vel og gott veður var alla leiðina frá Tyrklandi. „Hann komst upp í 17 mílur og gekk vel. Það var blíðuveður en ansi heitt á leiðinni um Miðjarðarhafið.“

Tveir farþegaklefar

Allar innréttingar og aðbúnaður fyrir áhöfn minnir helst á skemmtiferðaskip í hæsta gæðaflokki og meðal annars eru tveir farþegaklefar. Við upphaflega hönnun skipsins fyrir norska útgerð voru klefarnir hugsaðir fyrir gesti ef skipið yrði leigt til að þjónusta olíuiðnaðinn. Líka setustofa og fundarherbergi fyrir átta sem átti að nota í sama tilgangi.

Á trolli verða átta í áhöfn en ellefu á nótinni. „Öll veiðarfæri verða stærri og afkastameiri en maður hefur kynnst áður. Það er nýjung að við getum dælt beint úr trollinu að aftan. Þarf ekki að losa pokann frá sem er mikið vinnuhagræði fyrir okkur. Við förum á makríl þegar skipið verður tilbúið sem tekur einhverja daga,“ sagði Hörður að endingu.