Á miðvikudag var heildarafli laxa í 25 viðmiðunarám Landssambands veiðifélaga, sem skoða má á vefnum angling.is, orðinn 9.367 laxar. Vikuveiðin náði 2.

Á miðvikudag var heildarafli laxa í 25 viðmiðunarám Landssambands veiðifélaga, sem skoða má á vefnum angling.is, orðinn 9.367 laxar. Vikuveiðin náði 2.408 fiskum, sem að sögn Þorsteins Þorsteinssonar frá Skálpastöðum, sem safnar tölunum saman, er mesti vikuafli þessa sumars enn sem komið er.

„Ef við lítum aftur til laxveiðinnar sumarið 2012, sem var frekar slakt ár, þá var aflinn í viðmiðunarám Landssambands veiðifélaga kominn í 11.137 laxa tveimur dögum síðar um sumarið. Það má gera ráð fyrir að veiðin sé núna um þúsund löxum minni en þá,“ segir Þorsteinn og segist nú líta oft aftur til sumarsins 2007, sem er eina sumarið síðan byrjað var að halda utan um þessar tölulegu upplýsingar á þennan hátt sem veiðin var enn minni en nú í sumar.

„Nú er júlí að enda og ljóst orðið að ekki verður nein metveiði í laxánum þetta árið. Þetta er fremur lítill afli og sá minnsti síðan árið 2007, en þá hafði verið landað 8.744 löxum í þessum 25 ám 1. ágúst.“

Athygli vekur að þótt Rangárnar stígi nú á listanum þá eru göngur í þær ekkert í líkingu við það sem verið hefur síðustu ár. Þorsteinn segir árnar á Suðurlandi nú vera í 60 prósenta meðalveiði liðinna ára um þessi mánaðamót.