— Ljósmynd/Gunnar H Pálsson
27. október 1674 Hallgrímur Pétursson prestur og skáld lést, 60 ára að aldri. Hann var eitt helsta trúarskáld Íslendinga. Passíusálmar hans hafa komið út oftar en áttatíu sinnum, fyrst 1666. 27. október 1934 Stórtjón varð norðanlands í ofsaveðri.

27. október 1674

Hallgrímur Pétursson prestur og skáld lést, 60 ára að aldri. Hann var eitt helsta trúarskáld Íslendinga. Passíusálmar hans hafa komið út oftar en áttatíu sinnum, fyrst 1666.

27. október 1934

Stórtjón varð norðanlands í ofsaveðri. Sjór flæddi víða á land, meðal annars á Siglufirði. Á sumum götum bæjarins var mittisdjúpt vatn. Eitt skip fórst og bryggjur og hús skemmdust, allt frá Hvammstanga til Þórshafnar.

27. október 1936

Minnismerki um Niels R. Finsen var afhjúpað í Menntaskólanum í Reykjavík þar sem hann var við nám og lauk stúdentsprófi í júlí 1882. Finsen var brautryðjandi í ljóslækningum og hlaut Nóbelsverðlaun í læknisfræði árið 1903.

27. október 1955

Sænska akademían tilkynnti að Halldór Kiljan Laxness rithöfundur hlyti bókmenntaverðlaun Nóbels, fyrstur Íslendinga, „fyrir að endurnýja hina miklu íslensku frásagnarlist“. Hann veitti verðlaununum viðtöku í Stokkhólmi 10. desember.

27. október 1958

Morgunleikfimin hófst í Útvarpinu. Valdimar Örnólfsson og Magnús Pétursson sáu um þáttinn í aldarfjórðung, við miklar vinsældir.

Dagar Íslands | Jónas Ragnarsson