[ Smellið til að sjá stærri mynd ]
Baksvið Baldur Arnarson baldura@mbl.is Hótelherbergjum í Hveragerði gæti fjölgað um 160 á næstu misserum ef áform fjárfesta ganga eftir. Með þeim yrðu hátt í 400 hótelherbergi í Hveragerði og næturgestirnir farnir að nálgast 800 á háannatíma.

Baksvið

Baldur Arnarson

baldura@mbl.is

Hótelherbergjum í Hveragerði gæti fjölgað um 160 á næstu misserum ef áform fjárfesta ganga eftir. Með þeim yrðu hátt í 400 hótelherbergi í Hveragerði og næturgestirnir farnir að nálgast 800 á háannatíma.

Annars vegar eru hugmyndir um að byggja nýja álmu við Hótel Örk í Hveragerði. Rætt hefur verið um 60 herbergi, en með þeim yrðu alls 145 herbergi á hótelinu.

Jakob Arnarson, hótelstjóri á Hótel Örk, segir enga ákvörðun hafa verið tekna um framkvæmdir. „Við erum að endurnýja móttökuna og ætlum að opna nýjan og glæsilegan veitingastað, Hver Restaurant. Við ætlum að leggja áherslu á hráefni úr nágrenninu,“ segir Jakob.

Spurður um eftirspurnina eftir gistingu á hótelinu segir Jakob að þegar sé orðið vel bókað sumrin 2016 og 17. Síðustu mánuði hafi hann orðið var við þá breytingu að bókað sé lengra fram í tímann.

„Stærstu kaupendurnir eru farnir að reyna að tryggja sér herbergi lengra fram í tímann. Það hefur líka orðið mikil aukning yfir veturinn. Tímabilið frá febrúar og út október er orðið vel bókað. Desember er líka ágætur, enda erum við sterkir í jólahlaðborðum. Við höfum ekki yfir neinu að kvarta nú orðið.“

Suðurstrandarvegur hjálpar

Rekstrarfélagið Cabin ehf. á reksturinn á Hótel Örk, Hótel Cabin og Hótel Kletti.

Jóhann Sigurðsson, framkvæmdastjóri Hótel Cabin, segir Suðurstrandarveginn hafa hjálpað mikið til við rekstur Hótel Arkar.

„Við höfum rekið Hótel Örk frá 2004. Fyrstu árin gekk okkur ekki jafn vel að selja sumarið eins og mörgum öðrum hótelum. Við vorum það nálægt Reykjavík, sem var gjarnan fyrsti dvalarstaður hópa, að það hentaði ekki að taka næstu nótt í Hveragerði. Með tilkomu Suðurstrandarvegar hefur fyrsta nóttin, og jafnvel sú síðasta, verið tekin hjá okkur. Þá er ekki stoppað í Reykjavík. Það var upphafið að auknum viðskiptum á sumrin. Við það bætist aukin umferð ferðamanna. Það hjálpar að við höfum tvö vinsæl hótel í Reykjavík. Við getum því boðið upp á pakka fyrir gesti,“ segir Jóhann.

Hins vegar eru hugmyndir um 100 herbergja heilsuhótel á lóð Náttúrulækningafélags Íslands (NLFÍ).

Hjá Guðmundi F. Baldurssyni, skipulags- og byggingarfulltrúa Hveragerðis, fengust þær upplýsingar að aðalskipulagi hefði verið breytt „til að undirbúa jarðveginn, þannig að allt sé tiltækt þegar menn fara að teikna hús“. „Það eru komin frumdrög að útliti og skipulagi hússins,“ segir Guðmundur og bendir á að vinna við deiliskipulag eigi eftir að fara fram. Raunhæft sé að því ferli verði lokið í byrjun næsta árs.

Hér fyrir ofan má sjá yfirlit yfir hótel í Hveragerði. Samantektin er lausleg og er byggð á auglýsingum á vefjunum booking.com og hotels.com. Skal tekið fram að hér er eingöngu miðað við hótel og gististaði sem eru skráðir í Hveragerði. Á vefnum booking.com eru til dæmis tugir gististaða skráðir í nágrenninu. Þá er hér látið ógert að fjalla um uppbyggingu hótela og gististaða á Selfossi. Má þar nefna að unnið er að fjölgun herbergja á Hótel Selfossi um 40 og verða þau alls um 140.

Ingi Þór Jónsson, markaðsstjóri Heilsustofnunar NLFÍ, segir málið í vinnslu. Unnið sé að hönnun hótels og heilsulindar og mótun hugmyndafræðinnar að baki þjónustunni sem þar verður veitt.

„Náttúrulækningafélag Íslands vinnur ötullega að því að hefja uppbyggingu á heilsutengdri ferðaþjónustu, til hliðar við heilsustofnunina í Hveragerði. Það verður byggt á vandaðri þjónustu fyrir skilgreinda heilsuferðamenn.“

Bæta við lúxusíbúðum

„Sú breyting hefur orðið í hönnunarferlinu að nú er t.a.m. gert ráð fyrir rúmgóðum og vel búnum íbúðum með spa. Það er ákveðinn markhópur sem vill vera út af fyrir sig í lúxusaðstöðu. Slíkar íbúðir voru ekki í upphaflegum teikningum.“

Ingi Þór segir heilsutengda ferðaþjónustu í sókn. Fyrst og fremst sé horft til Bandaríkja- og Evrópumarkaðar. Um allan heim sé fólk í auknum mæli að huga að heilsusamlegum lífsstíl. Það vilji tengja saman upplifun, ferðalög og heilsuþjónustu. „Heilsutengd ferðaþjónusta skiptist í lækningaþjónustu og vellíðunarþjónustu. Það er enginn að blanda þessu tvennu saman á Íslandi. Við munum hins vegar gera það,“ segir Ingi Þór.

Íhuga stækkun á Hjarðarbóli

Sigríður Helga Sveinsdóttir, framkvæmdastjóri Hótels Hjarðarbóls, segir hótelið geta hýst allt að 64 gesti í 24 herbergjum. Þau séu dreifð um gömlu útihúsin. Hótelið er mitt á milli Hveragerðis og Selfoss og við rætur Ingólfsfjalls.

Reksturinn hófst árið 2012 og segir Sigríður Helga að eftirspurnin sé vaxandi.

Hugmyndir séu um að fjölga herbergjum á hótelinu. Þau áform séu á teikniborðinu. „Mínir helstu viðskiptavinir eru erlendir ferðamenn og erlendir skólahópar, mest breskir skólahópar,“ segir Sigríður Helga sem telur skólahópana sækja í sveitina.