[ Smellið til að sjá stærri mynd ]
Bogi Þór Arason bogi@mbl.is Marco Rubio, öldungadeildarþingmaður frá Flórída, gerði harða hríð að auðkýfingnum Donald Trump í sjónvarpskappræðum fimm frambjóðenda í forkosningum bandarískra repúblikana í Texas í fyrrakvöld. Rubio gagnrýndi m.a.

Bogi Þór Arason

bogi@mbl.is

Marco Rubio, öldungadeildarþingmaður frá Flórída, gerði harða hríð að auðkýfingnum Donald Trump í sjónvarpskappræðum fimm frambjóðenda í forkosningum bandarískra repúblikana í Texas í fyrrakvöld. Rubio gagnrýndi m.a. viðskiptahætti auðkýfingsins og sakaði hann um hræsni í deilunni um ólöglega innflytjendur. Trump lét þó engan bilbug á sér finna og virðist hafa staðist atlögu Rubio, að mati margra stjórnmálaskýrenda.

„Vitið þið hvað Donald Trump væri núna hefði hann ekki erft 200 milljónir dollara? Að selja úr á Manhattan,“ sagði Marco Rubio í einni af rimmum keppinautanna tveggja.

„Ég tók eina milljón og breytti henni í 10 milljarða dollara,“ svaraði Trump sem hefur lagt mikið upp úr sigrum sínum í viðskiptum og lofað að koma Bandaríkjunum á sigurbraut.

Réð ólöglega innflytjendur

Rubio gagnrýndi stefnu Trumps í innflytjendamálum, m.a. loforð hans um að reisa múr við landamærin að Mexíkó og flytja milljónir ólöglegra innflytjenda frá Rómönsku Ameríku úr landi. Rubio sagði að Trump hefði eitt sinn stutt breytingar á lögum til að gera óskráðum innflytjendum kleift að fá ríkisborgararétt í Bandaríkjunum. Hann gagnrýndi einnig Trump fyrir að hafa ráðið „verulegan fjölda manna frá öðrum löndum í störf sem Bandaríkjamenn hefðu getað fengið“ og minnti á að auðkýfingurinn var dæmdur til að greiða sekt fyrir að ráða 200 ólöglega innflytjendur frá Póllandi þegar Trump-turninn á Manhattan var reistur á níunda áratug aldarinnar sem leið. „Ég hef ráðið tugi þúsunda manna,“ sagði þá Trump. „Þú hefur ekki ráðið einn einasta mann, lygari.“

Ted Cruz, öldungadeildarþingmaður frá Texas, réðst einnig snarplega gegn Trump, sagði hann koma úr röðum frjálslyndra Bandaríkjamanna þótt hann sæktist nú eftir atkvæðum íhaldssamra repúblikana í forkosningunum. Cruz gagnrýndi Trump fyrir að hafa styrkt demókrata með fjárframlögum, þ.ám. Hillary Clinton, fyrrverandi utanríkisráðherra, sem er líkleg til að verða forsetaefni demókrata. „Við getum ekki sigrað í kosningunum í nóvember með forsetaefni sem er sammála Hillary Clinton og getur ekki sigrað hana í kappræðum og í kosningunum,“ sagði Cruz. Trump svaraði fullum hálsi og sagði að Cruz hefði getið sér orð fyrir að vera verst þokkaði þingmaður öldungadeildarinnar. „Þér semur ekki við neinn,“ sagði hann. „Þú hefur ekki fengið stuðning eins einasta manns í öldungadeildinni og þú vinnur með þessum mönnum. Þú ættir að skammast þín!“ sagði hann.

Trump skírskotaði til þess að margir þingmenn og ríkisstjórar úr röðum repúblikana telja Cruz vera of íhaldssaman og einstrengingslegan í samfélagsmálum til að eiga möguleika á að sigra Clinton ef hún verður forsetaefni demókrata. Margir þeirra styðja nú Rubio og telja hann eina frambjóðandann sem eigi möguleika á að sigra Trump í forkosningunum og síðan forsetaefni demókrata í kosningunum í nóvember.

Rubio var gagnrýndur fyrir að tala oft eins og vélmenni í fyrri kappræðum, endurtaka sömu þaulæfðu setningarnar aftur og aftur, en var miklu beinskeyttari í kappræðunum í fyrrakvöld. Margir stjórnmálaskýrendur eru þó efins um að atlaga hans að Trump hafi mikil áhrif í forkosningunum á þriðjudaginn kemur, 1. mars, stærsta deginum í kosningabaráttunni.

Stórir dagar framundan
» Á þriðjudaginn kemur verður kosið í þrettán ríkjum sem eru með alls 661 af 2.472 kjörmönnum sem velja forsetaefni repúblikana formlega.
» Rúmlega 300 kjörmenn verða síðan kjörnir 5. og 8. mars.
» Meira en 350 kjörmenn verða valdir 15. mars, á næststærsta deginum í baráttunni.
» Frá og með þeim degi verður sú breyting að kjörmönnum hvers ríkis er ekki lengur úthlutað í hlutfalli við atkvæðafjölda frambjóðenda, heldur fær fylgismesti frambjóðandinn alla kjörmennina.