Síðasta laugardag svifaði sem oftar gátu til Guðmundar Arnfinnssonar og hann sendi hana áfram: Lítillátur er hann eigi. Enginn sigrar kappa þann. Sleginn er á einum degi. Er í Vatnsmýrinni hann.

Síðasta laugardag svifaði sem oftar gátu til Guðmundar Arnfinnssonar og hann sendi hana áfram:

Lítillátur er hann eigi.

Enginn sigrar kappa þann.

Sleginn er á einum degi.

Er í Vatnsmýrinni hann.

Helgi Seljan leysir gátuna þannig:

Völlur er á mörgum manni

mjög er gott að halda velli.

Dagslátta var sögð með sanni

sáust flugtök þar í hvelli.

Guðrún Bjarnadóttir svarar:

Það er völlur á sjálfhælnum. Sé ég líka

ég sigri enga sem heldur velli.

Velli í dagsláttu dugleg flíka,

deili um flugvöll og yrki í hvelli.

Þessi er lausn Helga R. Einarssonar:

Lögðu saman glópska og greind,

gamalkunnar stöllur.

Gátunnar því leystu leynd.

Lausnin reyndist: völlur.

Sjálfur skýrir Guðmundur gátuna þannig:

Völlur þykir Óla á.

Ei hann leggja að velli má.

Völl á degi vaskir slá.

Í Vatnsmýri ég flugvöll sá.

Og lætur limru fylgja:

Þó Óla sé brigslað um elli

enn mun hann sterkur á svelli

og sigrað fær alla

jafnt konur sem kalla

sá kall heldur alltaf velli.

Og loks segist Guðmundur hafa „bögglað saman einni gátu rétt í þessu“:

Oft það felur í sér vald.

Er á vöru lækkað gjald.

Fundarkvaðning einnig er.

Aðvörun svo gæt að þér.

Páll Imsland heilsaði leirliði á fimmtudag og sagðist mega til að rifja upp gamla limru í tilefni umræðunnar:

Það er merkilegt vatn þetta Mývatn

sem er mestmegnis einungis slývatn.

og ef túrisminn vex þar

upphefst töluvert pex þar,

auk þess pollurinn breytist í pí-vatn.

Og bætir við „Þetta síðasta orð ætti ég kannski að rita „pee“-vatn.“

Og þann hinn sama dag sagði hann líka: „Mikið skelfing og ósköp er“ – leiðinleg öll þessi kosningaræða daganna. Hvers vegna er það ekki byggt inn í stjórnarskrána að hafa hér sjálfkjörið?

Róshildur ráðskona' á Bjargi

var rökföst og frábitin þvargi,

og guðsorðatali

og trúmálahjali

öllu tók hún með reiði og gargi.

Halldór Blöndal

halldorblondal@simnet.is