Guðni Th. Jóhannesson nýtur stuðnings ríflega 2/3 kjósenda, eða 67,1%, skv. könnun um fylgi við forsetaframbjóðendur sem Félagsvísindastofnun HÍ gerði fyrir Morgunblaðið í vikunni. Davíð Oddsson hefur 17,4% fylgi og Andri Snær Magnason er með 7,8%.

Guðni Th. Jóhannesson nýtur stuðnings ríflega 2/3 kjósenda, eða 67,1%, skv. könnun um fylgi við forsetaframbjóðendur sem Félagsvísindastofnun HÍ gerði fyrir Morgunblaðið í vikunni. Davíð Oddsson hefur 17,4% fylgi og Andri Snær Magnason er með 7,8%. Sturla Jónsson mælist með 1,8% fylgi og Halla Tómasdóttir með 1,5%. Aðrir hafa minni stuðning. Fjórir frambjóðendur hafa 0,1% fylgi og tveir mælast fylgislausir.

Alls 2.003 manns voru í úrtaki könnunar Félagsvísindastofnunar sem gerð var yfir netið. Reynt var að tryggja að þverskurður af þjóðinni væri úrtakið í könnuninni, sem 937 manns svöruðu eða 47% þeirra sem leitað var til.

Samkvæmt svörunum hefur Guðni 67% fylgi á höfuðborgarsvæðinu og svipað úti á landi og hann styðja 61% karla og 73% kvenna. Davíð Oddsson hefur 23% karla að baki sér og 11% kvenna. Þá hefur Davíð meiri stuðning úti á landi en á höfuðborgarsvæðinu. Þar segjast 15% kjósenda styðja hann en 20% landsbyggðarfólks.

Alls 53% sjálfstæðismanna styðja Davíð en 40% Guðna, sem annars hefur fylgi meirihlutans í öllum öðrum stjórnmálahreyfingum, til dæmis 90% meðal stuðningsmanna Bjartrar framtíðar og Samfylkingar. 19% vinstri grænna segjast styðja Andra Snæ Magnason. sbs@mbl.is 4