Sigríður Stefánsdóttir hjúkrunarfræðingur fæddist 26. mars 1955. Hún lést á heimili sínu í Hveragerði 23. október 2017.

Foreldrar Sigríðar voru Ásta Lára Guðmundsdóttir hjúkrunarfræðingur, fædd á Rifi, Snæfellsnesi 23. desember 1921, d. 19. apríl 2007, og Stefán Páll Björnsson læknir, fæddur í Viðey 8. janúar 1919, d. 22. desember 1999. Eftirlifandi bræður Sigríðar eru: a) Guðmundur Jóhann Stefánsson, fæddur 4. júní 1951, giftur Bylgju Bragadóttur, b) Björn Stefánsson, tvíburabróðir Sigríðar, fæddur 26. mars 1955, giftur Örnu Sigríði Guðmundsdóttur, c) Stefán Lárus Stefánsson, fæddur 6. mars 1957, giftur Guðrúnu Bryndísi Harðardóttur og d) Steingrímur Páll Stefánsson, fæddur 7. október 1960, var giftur Nancy Ulbrandt.

Eftirlifandi eiginmaður Sigríðar er Sigurgeir Snorri Gunnarsson, f. 25. apríl 1953.

Sigríður útskrifaðist sem hjúkrunarfræðingur frá Hjúkrunarskóla Íslands og tók síðan stúdentspróf frá Fjölbrautaskólanum í Ármúla og innritaðist síðan í hjúkrunarfræðina í Háskóla Íslands og útskrifaðist 1987.

Minningarathöfn um Sigríði fór fram í Fossvogskapellu 15. nóvember 2017.

Útför Sigríðar fer fram frá Ásheimum, Efra-Ási í Hjaltadal í dag, 18. nóvember 2017, klukkan 14. Jarðsett verður í Hofsóskirkjugarði.

Sigríður ólst upp ásamt okkur að Laugavegi 139 eftir að fjölskylda pabba flutti frá Viðey þar sem afi, Björn Jónsson, og amma, Sigríður Gísladóttir, höfðu annast um búið í eyjunni. Að Laugavegi 139 ráku þau smávöruverslun sem hét Ásbyrgi.

Pabbi og mamma ólu önn fyrir okkur þar, afi og amma bjuggu þar fram á sína síðustu daga og einnig bróðir pabba, Skúli Björnsson, kona hans Áslaug Ágústsdóttir og dóttir þeirra Sigríður.

Í stað þess að flytja í stærra húsnæði með sína stóru fjölskyldu afréð pabbi að byggja við húsið þannig að með tímanum varð rýmra um barnaskarann. Hverfið sem Sigríður ólst upp í var kjöruppeldissvæði fyrir börn en þar voru ungar fjölskyldur hvaðanæva af landinu. Á svæði sem afmarkaðist af efsta hluta Hverfisgötu, enda Rauðarárstígs, efsta hluta Skúlagötu og hluta Laugavegs fyrir ofan Hlemm var innilokað svæði. Þar var Stínuróló, fótboltavöllur, körfuboltagrind og leiktæki ýmiskonar, draumasvæði fyrir börn.

Það hefur ekki verið grín að vera eina systirin í þessum strákahópi en ekki slettist mikið upp á vinskapinn en mamma og pabbi héldu vel utan um barnahópinn. Frelsið til athafna var margfalt meira en í dag og algengt var að börn færu út að morgni og kæmu ekki heim fyrr en kvölda tók. Sigríður bjó lengst af heima hjá foreldrum sínum en illu heilli missti hún tiltölulega ung heilsuna þannig að starfsferillinn varð alltof stuttur og hún gat ekki notið til fulls þeirrar miklu menntunar sem hún hafði aflað sér á hjúkrunarfræðingssviðinu. Síðustu æviárin bjó Sigríður með Snorra sínum í Hveragerði og þar lést hún að nóttu til mánudaginn 23. október. Þau höfðu gengið í hjónaband sólríkan laugardag 30. september að viðstöddum nánustu skyldmennum í afskaplega fallegri athöfn. Þá gat enginn rennt grun í að Sigga ætti stutt eftir.

Guð blessi minningu Siggu okkar.

Guðmundur Jóhann

Stefánsson,

Stefán Lárus Stefánsson.

mbl.is/minningar