Dæmdur Jensen gengur í sal Héraðsdóms Óslóar í september 2017.
Dæmdur Jensen gengur í sal Héraðsdóms Óslóar í september 2017. — Morgunblaðið/Atli Steinn Guðmundsson
Atli Steinn Guðmundsson skrifar frá Ósló Tíu manna kviðdómur í máli fyrrverandi yfirlögregluþjóns í Ósló, Eiriks Jensens, kvað í gærmorgun upp þann úrskurð að Jensen skyldi vera sýkn af hlutdeild í innflutningi á 14 tonnum af hassi sem hann hafði hlotið...

Atli Steinn Guðmundsson

skrifar frá Ósló

Tíu manna kviðdómur í máli fyrrverandi yfirlögregluþjóns í Ósló, Eiriks Jensens, kvað í gærmorgun upp þann úrskurð að Jensen skyldi vera sýkn af hlutdeild í innflutningi á 14 tonnum af hassi sem hann hafði hlotið 21 árs dóm fyrir í Héraðsdómi Óslóar haustið 2017. Kviðdómur vildi hins vegar sakfella Jensen fyrir stórfellda spillingu þar sem refsiramminn er tíu ár.

Kristel Heyerdahl dómsformaður tók sér tveggja stunda frest ásamt meðdómurum sínum til að taka afstöðu til úrskurðar kviðdóms og var niðurstaðan lögð fram klukkan 14 að norskum tíma, 13 að íslenskum. Niðurstöðu kviðdóms var þar vikið til hliðar hvað fíkniefnahlutann snertir. „Dómurinn telur það hafið yfir vafa að Jensen er sekur um fíkniefnabrot og víkur niðurstöðu kviðdóms til hliðar. Málið verður rekið á nýjan leik frá grunni.“

Í 659 áfrýjunarmálum frá 2013 til þessa dags hefur dómari hundsað úrskurð kviðdóms 37 sinnum, eða í 5,6 prósentum tilvika, 38 sinnum að meðtöldum úrskurðinum í gær. Átján sinnum vék dómari til hliðar sýknuúrskurði kviðdóms, nú 19 sinnum, og 19 sinnum sektarúrskurði.

„Þarna segja þrír löglærðir einstaklingar bókstaflega „Þetta kunnum við betur en þið,“ og traðka þar með á valdi þjóðarinnar til að dæma í málum meðbræðra sinna. Svona virkar réttarríki ekki sem á að eiga rætur sínar hjá þjóðinni og vera fyrir þjóðina,“ sagði John Christian Elden, verjandi Jensens, við mbl.is í gær.