Afmæliskveðja Trausti Þórðarson frá Háleggsstöðum Í dag, 10. desember, fyllir vinur og fyrrum góður granni áttunda tuginn, Trausti Þórðarson fyrrum bóndi á Háleggsstöðum í Deildardal í Austur-Skagafirði. Þegar litið er til baka, líður tímans straumur áfram eins og óstöðvandi elfa, sem engin takmörk á né endamörk. En á tímamótum stöldrum við eilítið við og minnumst liðinna daga og ára.

Trausti er borinn og barnfæddur 10. desember árið 1918 í fagurri skagfirskri fjallabyggð, þar sem Tungufjallið stendur fyrir botni Deildardalsins, hátt og tignarlegt, en er horft er til hafs, rís Drangey úr djúpi, eins og útvörður fjarðarins.

Foreldrar hans voru Þórður Hjálmarsson og kona hans, Þóranna Þorgilsdóttir, sem bjuggu nær allan sinn búskap á Háleggsstöðum.

Voru þau bæði komin út af dugnaðar- og kjarnafólki og fór mikið orð af feðrum þeirra, Hjálmari í Stafni og Þorgilsi á Kambi, er þóttu miklir fyrir sér, en þau hjón voru bræðrabörn.

Voru þeir bræður báðir ham rammir að afli og samrýndir svo, að hvorugur mátti af öðrum sjá. Er fara átti í kaupstað á Hofsósi, tjaldaði sá, er fyrri var til, hvítum dúk á bæjarhlaði, til að láta hinn vita um för. Síðan var haldið í kaupstað, þar sem verslað var og ýmsum erindum sinnt. Þegar haldið var heim á leið var tveggja lítra, græn málaður brennivínskútur reiddur á hnakki, að hætti betri bænda. Síðanvar slegið upp veislu er heim kom.

Eigi fór þó orð af neinni óreglu þeirra bræðra, umfram það er þá tíðkaðist í kaupstaðarferðum, en þeir voru hinir mestu dugnaðar- og ráðdeildarmenn.

Þau hjón á Háleggsstöðum eignuðust fjóra sonu. Hjálmar var þeirra elstur, en hann lést ungur að aldri. Næstur honum var Þorgils bóndi á Stafnshóli, látinn fyrir nokkru. Trausti og Steinar lifa bræður sína.

Trausti tók við búi foreldra sinna og bjó ásamt Steinari bróður sínum félagsbúi á Háleggsstöðum um árabil. Hann var mjög bundinn átthögum sínum og undi hag sínum vel í hinum grösuga fjalladal, sem og þeir frændur. Byggðu þeir afkomendur Hjálmars og Þorgils nær allar jarðir dalsins.

Enn standa rætur hans þar nyrðra djúpt og gera þeir bræður sér árlega ferð norður, til þess að vitja æskustöðvanna og heimsækja frændur og vini.

Trausti er vinsæll maður og vinmargur. Minnist ég liðinna ára, á húsvitjunarferðum mínum um dalinn er komið var að Háleggsstöðum. Voru viðtökur jafnan höfðinglegar og heimilisfólk ræðið og skemmtilegt.

Lýsti allt innan sem utandyra af grónum íslenskum háttum, en Trausti hefir jafnan viljað viðhalda þjóðlegum hefðum, sem og frændur hans gerðu um langan aldur í Deildardal.

Honum voru snemma falin nokkur trúnaðarstörf í þágu sveitar sinnar, en hann sat í hreppsnefnd Hofshrepps um langt skeið. Fjall skilastjóri mun hann og hafa verið og réttarstjóri í Deildardalsrétt.

Árið 1964 tóku þeir bræður sig upp og fluttust búferlum tilReykjavíkur. Hefir Trausti átt heimili sitt á Klapparstíg 11.

Tók hann við starfi hjá Ölgerðinni Agli Skallagrímssyni, þar sem hann vann um árabil.

Hann er nú hættur störfum og dvelur um þessar mundir á Náttúrulækningahælinu í Hveragerði.

Ég vil í lok þessara fátæklegu orða flytja þessum góða vini hamingjuóskir okkar hjóna, á þessum stóru tímamótum í ævi hans, í vonum að Elli kerling megi taka á honum mjúkum tökum nú enn um langan aldur. Lifðu heill.

Árni Sigurðsson