LÍF OG FJÖR Í LATABÆ Barnaleikritið Áfram Latibær eftir Magnús Scheving verður frumsýnt í Loftkastalanum í dag kl. 14. ÞRÖSTUR HELGASON hitti höfund og leikstjóra verksins sem stefnir að því að gera þetta að stórum söngleik.

LÍF OG FJÖR Í LATABÆ Barnaleikritið Áfram Latibær eftir Magnús Scheving verður frumsýnt í Loftkastalanum í dag kl. 14. ÞRÖSTUR HELGASON hitti höfund og leikstjóra verksins sem stefnir að því að gera þetta að stórum söngleik.

G skrifaði bókina sem leikritið er byggt á upp úr fyrirlestrum sem ég hélt fyrir krakka í skólum víða um land í nokkur ár," segir Magnús Scheving. "Á þessum fyrirlestrum vöknuðu ýmsar spurningar hjá krökkunum um heilbrigði, svo sem um það hvernig maður gæti hætt að borða sælgæti og byrjað að hreyfa sig. Leikritið reynir að svara þessum spurningum. Í því koma fram ýmsar persónur sem krakkarnir kannast örugglega við, eins og Halla hrekkjusvín, Nenni níski og Maggi mjói. Þetta eru kannski krakkar eins og þau eiga helst ekki að vera en síðan fjallar leikritið um það hvernig hægt er að breyta til góðs."

Snúið til betri vegar

Sagan Áfram Latibær fjallar í stuttu máli um bæ einn þar sem bæjarbúar eru óskaplega latir, hugsa ekkert um heilsuna og eyða öllum stundum fyrir framan sjónvarpið. Börnin í bænum háma í sig sælgæti alla daga, liggja í tölvuleikjum og hafa gleymt hvernig á að leika sér. Bæjarstjórinn í Latabæ, sem er fyrrum afreksmaður í íþróttum, er fallinn í sömu gryfju og aðrir bæjarbúar og liggur gamli íþróttabúningurinn hans rykfallinn í fataskápnum. Hann lendir því í miklum vandræðum þegar honum berst bréf frá forsetanum þess efnis að halda eigi íþróttahátíð í öllum bæjum landsins. Í hugarangri sínu hittir hann íþróttaálfinn sem býður aðstoð sína til að hjálpa bæjarbúum við að ná tökum á lifanaðarháttum sínum.

Boðskapur sögunnar er að heilbrigði, lífsgleði og jákvæð samskipti borgi sig. Þetta kemur fram í sögunni á jákvæðan og skemmtilegan hátt og vegur þar þyngst ímynd íþróttaálfsins sem er fullur af lífsgleði og atorku. Hann leiðbeinir bæjarbúum um hvernig þeir geti breytt lífsmáta sínum til hins betra og kennir þeim leiki og æfingar. Tekið er á ýmsu svo sem muninn á ofbeldi og leik, eigingirni, mataræði og fleira.

Mikið sjónarspil

Magnús segir að hann hafi alltaf séð þessa sögu fyrir sér á sviði. "Baltasar Kormákur, sem leikstýrir verkinu, hefur náð að færa hana á svið nánast nákvæmlega eins og ég hafði séð hana fyrir mér. Og það hefur reyndar komið fólk hérna á æfingar sem þekkir bókina og fundist takast að sviðssetja bókina á einkar skemmtilegan hátt svo að sagan hreinlega lifni við á sviðinu."

Baltasar segir að það sé mikið lagt í þessa sýningu enda borgi sig aldrei að spara þegar verið sé að setja upp sýningu fyrir börnin, þau finni það strax. "Að þessu leyti verður þetta eins og aðrir söngleikir sem ég hef gert, mikið sjónarspil og góð stemmning. Ég myndi vilja óska þess að krakkarnir skemmtu sér jafnvel á þessari sýningu og fullorðna fólkið gerði á söngleiknum Hárinu. Og það var kannski þess vegna sem Maggi bað mig um að taka leikstjórn verksins að mér; hann vill fá þessa sömu stemmningu fram fyrir krakkana og hefur verið á öðrum söngleikjum mínum."

"Já, það er mikilvægt að ekki sé talað niður til barnanna," heldur Magnús áfram. "Þau verða að skemmta sér eins og þau best geta. Ég held að það hafi tekist hérna. Það er mikið líf og fjör í sýningunni og hún er spennandi."

Fjölmargir koma fram í sýningunni og í þeim hópi er margt kunnra leikara og skemmtikrafta. Með aðalhlutverk fara Magnús Scheving, Magnús Ólafsson, Steinn Ármann Magnússon, Sigurjón Kjartansson, Selma Björnsdóttir, Sigurveig Jónsdóttir, Pálína Jónsdóttir, Jón Stefán kristjánsson, Ingrid Jónsdóttir, Ari Matthíasson og Ólafur Guðmundsson. "Ég hef farið þá leið," segir Baltasar, "að velja mjög afgerandi fólk í hlutverkin, það er að segja fólk sem hefur mjög skýr einkenni. Þetta er svo ýkt svolítið þannig að útlitið á sýningunni verður eins og í teiknimyndasögu. Búningar og leikmyndir undirstrika þetta líka. Persónurnar verða þannig mjög sterkar."

Óvenju heilbrigður texti

Magnús og Baltasar segja að æfingar hafi gengið vel og samstarfið einnig. Magnús segist í fyrsta skipti á ævinni hafa upplifað það undir leikstjórn Baltasars að vera beðinn um að vera svolítið hressari. "Baltasar er fyrsti maðurinn sem hefur beðið mig um að leggja mig aðeins meira fram og gefa meira í leikinn, hamast svolítið meira. Ég hélt að ég ætti nú aldrei eftir að upplifa það að ég fengi slíka athugasemd.

Það er líka skemmtilegt að þetta leikrit inniheldur óvenju heilbrigðan texta sem leikararnir eru kannski ekki vanir. Stundum hafa þeir því átt í dulitlu basli með sumar línurnar. Þeir hafa ekki alveg kunnað við þær, þar sem þær hafa kannski gengið þvert á lífnaðarhætti þeirra. En það hefur nú ræst úr því öllu saman."

Frumsamin tónlist er í sýningunni eftir Mána Svavarsson við texta eftir Davíð Þór Jónsson. Búninga gerði María Ólafsdóttir. Miðasala fer fram í gegnum hraðbanka Íslandsbanka.

Morgunblaðið/Golli

ÍÞRÓTTAÁLFURINN leiðbeinir bæjarbúum um hvernig þeir geti breytt lífsmáta sínum til hins betra og kennir þeim leiki og æfingar. Selma Björnsdóttir og Magnús Scheving í hlutverkum Sollu stirðu og Íþróttaálfsins.

BOÐSKAPUR sögunnar er að heilbrigði, lífsgleði og jákvæð samskipti borgi sig. Ólafur Guðmundsson og Steinn Ármann Sigurðsson í hlutverkum Nenna níska og Sigga sæta.